سوز پروانہ نور دین شمع

سوز پروانہ نور دین شمع

تار زنار دل نشین شمع

قطرۂ خون زخم پروانہ

قشقۂ تازۂ جبین شمع

تم بھی دو ایک بوسہ بہر خدا

کہ ہے گلگیر بوسہ چین شمع

دانۂ عشق بو رہا ہے پتنگ

سوختہ گرچہ ہے زمین شمع

میری عرض حیات کا ہے طول

نفس تنگ واپسین شمع

آہ پروانہ کا پریشاں دود

بن گیا زلف عنبرین شمع

قدر مجنوں نہ ہوگی میرے بعد

خاک جگنو ہو جانشین شمع

روز اول سے ہیں بہم مربوط

دست پروانہ آستین شمع

حق میں پروانہ کے ہے تیر شہاب

اے وقارؔ آہ آتشین شمع

soz-e-parwana nur-e-din-e-shama

tar-e-zunnar-e-dil nashin-e-shama

qatra-e-khun-e-zakhm-e-parwana

qashqa-e-taza-e-jabin-e-shama

tum bhi do ek bosa bahr-e-khuda

ke hai gulgir bosa chain-e-shama

dana-e-ishq bu raha hai patang

sokhta garche hai zamin-e-shama

meri arz-e-hayat ka hai tul

nafas-e-tang wapasyun shama

ah parwana ka pareshan dud

ban gaya zulf-e-ambarin-e-shama

qadr majnun na hogi mere baad

khak jugnu ho janishin-e-shama

roz-e-awwal se hain baham marbut

dast-e-parwana astin-e-shama

haq mein parwana ke hai tir-e-shahab

ai waqar ah atishyun shama