سکۂ داغ جنوں ملتے جو دولت مانگتا

سکۂ داغ جنوں ملتے جو دولت مانگتا

تنگ کرتی مفلسی گر میں فراغت مانگتا

رنج سے فرصت نہ ملتی میں جو راحت مانگتا

بوجھ ہوتا سر پہ گر قاروں کی دولت مانگتا

گر مجھے ہوتی خبر میرا مسیحا آئے گا

اے اجل اک دم کی میں بھی تجھ سے مہلت مانگتا

خضر کی سی زندگی ہوتی جو مجھ ناکام کی

میں دعائے وصل جاناں تا قیامت مانگتا

اشک کے دریا نے رکھ لی آبرو اے چشم تر

مرتے دم دو گز زمین کیا بہر تربت مانگتا

کس کی آمد آمد اپنے کلبۂ احزاں میں ہے

پیشوائی کو ہے دل پہلو سے رخصت مانگتا

در گزرتا جان تک کرتا زمیں اوس سے عزیز

مجھ سے دربان در جاناں جو رشوت مانگتا

نزع تک دیدار کی حسرت رہی مشتاق کو

اے مسیحا مر گیا بیمار شربت مانگتا

در بدر پھرنے نے میری قدر کھوئی اے فلک

ان کے دل میں ہے جگہ ملتی جو خلوت مانگتا

منتیں کر کے چھڑاتا بلبلوں کو دام سے

میں زر گل دیتا اگر صیاد قیمت مانگتا

آدمیت سے ہیں دور ان زاہدوں کے قول و فعل

حق موروثی تھا میرا کیوں میں جنت مانگتا

جان دی ناحق کو مکارہ کے دم میں آن کر

کوہ کن شیریں سے محنت کی جو اجرت مانگتا

قصد کرتا گر بلندی کا تو پستی دیکھتا

کند ہو جاتی طبیعت گر میں جودت مانگتا

زلف کے جنجال میں پھنسنے کی خود کرتا دعا

میں سڑی تھا جو خدا سے اپنی شامت مانگتا

قائل اپنی گفتگو سے خاص کا ہوتا کلیم

سعدیٔ شیراز بھی مجھ سے فصاحت مانگتا

یار ہوتا باغ ہوتا ایسے گر ہوتے نصیب

مے کشی کی محتسب سے میں اجازت مانگتا

دشت وحشت خیز میں عریاں ہے آغاؔ آپ ہی

قاصد جاناں کو کیا دیتا جو خلعت مانگتا

sikka-e-dagh-e-junun milte jo daulat mangta

tang karti muflisi gar main faraghat mangta

ranj se fursat na milti mein jo rahat mangta

bojh hota sar pe gar qarun ki daulat mangta

gar mujhe hoti khabar mera masiha aega

ai ajal ik dam ki main bhi tujh se mohlat mangta

khizr ki si zindagi hoti jo mujh nakam ki

main dua-e-wasl janan ta qayamat mangta

ashk ke dariya ne rakh li abru ai chashm-e-tar

marte dam do gaz zamin kya bahr-e-turbat mangta

kis ki amad amad apne kulba-e-ahzan mein hai

peshwai ko hai dil pahlu se rukhsat mangta

dar guzarta jan tak karta zamin os se aziz

mujh se darban dar janan jo rishwat mangta

nazaa tak didar ki hasrat rahi mushtaq ko

ai masiha mar gaya bimar sharbat mangta

dar badar phirne ne meri qadr khoi ai falak

un ke dil mein hai jagah milti jo khalwat mangta

minnaten kar ke chhurata bulbulon ko dam se

main zar-e-gul deta agar sayyad qimat mangta

admiyyat se hain dur in zahidon ke qaul-o-fel

haq-e-maurusi tha mera kyun main jannat mangta

jan di nahaq ko makara ke dam mein an kar

koh kin shirin se mehnat ki jo ujrat mangta

qasd karta gar bulandi ka to pasti dekhta

kand ho jati tabiat gar main jaudat mangta

zulf ke janjal mein phansne ki khud karta dua

main sari tha jo khuda se apni shamat mangta

qail apni guftugu se khas ka hota kalim

saadi-e-shiraz bhi mujh se fasahat mangta

yar hota bagh hota aise gar hote nasib

mai kashi ki mohtasib se main ijazat mangta

dasht-e-wahshat khez mein uryan hai agha ap hi

qasid janan ko kya deta jo khilat mangta