سوز دل ہر شب ہمیں اپنا ہی بتلاتی ہے شمع

سوز دل ہر شب ہمیں اپنا ہی بتلاتی ہے شمع

دل کا جلنا ہم دکھاتے ہیں تو جل جاتی ہے شمع

یہ دھواں نیں درد سے بھرتی ہے آہیں جاں گداز

کس نزاکت سات ایک ایک اشک ٹپکاتی ہے شمع

سر ستے پاؤں تلک غرق عرق بے وجہ نیں

بے حجاب اس شعلہ رو کو دیکھ شرماتی ہے شمع

شعلہ رو کے دیکھنے کی یاں تلک مشتاق ہے

پاؤں تک سر سے لگا کر آنکھ بن جاتی ہے شمع

عشقؔ پروانے کے ماتم میں وہ اپنے بال کھول

سوز دل سے آہ کیا رونے میں بھر جاتی ہے شمع

soz-e-dil har shab hamen apna hi batlati hai shama

dil ka jalna ham dikhate hain to jal jati hai shama

ye dhuan nain dard se bharti hai ahen jan gudaz

kis nazakat sat ek ek ashk tapkati hai shama

sar satte paon talak gharq-e-araq be wajh nain

be hijab is shola ro ko dekh sharmati hai shama

shola ro ke dekhne ki yan talak mushtaq hai

paon tak sar se laga kar ankh ban jati hai shama

ishq parwane ke matam mein wo apne bal khol

soz-e-dil se ah kya rone mein bhar jati hai shama