سہارا دے نہیں سکتے شکستہ پاؤں کو

سہارا دے نہیں سکتے شکستہ پاؤں کو

ہٹاؤ راہ محبت سے رہنماؤں کو

بنا رہا ہوں حسیں اور مہ لقاؤں کو

سجا رہا ہوں میں آفاق کی فضاؤں کو

نظر نظر سے ملاتا ہوں مسکراتا ہوں

جنوں کی شان دکھاتا ہوں دل رباؤں کو

قدم قدم پہ نئے انقلاب رقصاں ہیں

دعائیں دیتے ہیں ہم آپ کی اداؤں کو

ملا جو دامن ساحل تو ایسی موج آئی

سفینے سونپ دئیے ہم نے ناخداؤں کو

نگاہ پھیرنے والوں سے پوچھتا ہوں میں

تم آزماؤ گے کب تک مری وفاؤں کو

ابھی تو دشت و دمن میں بہار آئی ہے

ابھی چمن میں کھلانے ہیں گل ہواؤں کو

چلے ہیں جانب دار و رسن خراباتی

گنہ کا رنگ دکھانا ہے پارساؤں کو

ہر ایک لمحۂ نو کا اب احترام کرو

نیا پیام دو اخترؔ نئی فضاؤں کو

sahara de nahin sakte shikasta paon ko

hatao rah-e-mohabbat se rahnumaon ko

bana raha hun hasin aur mah liqaon ko

saja raha hun main afaq ki fazaon ko

nazar nazar se milata hun muskurata hun

junun ki shan dikhata hun dil rubaon ko

qadam qadam pe nae inqilab raqsan hain

duaen dete hain ham ap ki adaon ko

mila jo daman-e-sahil to aisi mauj ai

safine saunp diye ham ne nakhudaon ko

nigah pherne walon se puchhta hun main

tum azmaoge kab tak miri wafaon ko

abhi to dasht-o-daman mein bahar ai hai

abhi chaman mein khilane hain gul hawaon ko

chale hain janib dar-o-rasan kharabati

gunah ka rang dikhana hai parsaon ko

har ek lamha-e-nau ka ab ehtiram karo

naya payam do akhtar nai fazaon ko