آئے ہیں بادہ نوش بڑی آن بان پر

آئے ہیں بادہ نوش بڑی آن بان پر

میلہ لگا ہے پیر مغاں کی دکان پر

ساقی عطا ہو اب مجھے ساغر شراب کا

چھائی ہوئی ہے کیسی گھٹا آسمان پر

روتے ہیں تیرے عشق میں اے رشک ماہ جب

کرتے ہیں لوگ خندہ ہماری فغان پر

پیدا ہوا اثر نہ کبھی میری آہ میں

کھایا نہ اس نے رحم کبھی بے زبان پر

اے کاش یہ نصیب کریں اتنی یاوری

پہنچوں کبھی میں شب کو تمہارے مکان پر

کس شان سے وہ آج گئے ہیں عدو کے گھر

مجھ سے بگڑ کے پہنچے ہیں وہ آسمان پر

اللہ شب فراق میں وہ آہ و زاریاں

ہر وقت صدمے کیسے ہیں مجھ نیم جان پر

لکھا جو خط شوق انہیں میں نے ہجر میں

رونے لگے رقیب بھی میرے بیان پر

یا رب ترے ہی فضل کا امیدوار ہوں

کھاتا نہیں ہے رحم کوئی ناتوان پر

ہر دم ترے فراق میں پھرتا ہوں سو بہ سو

لاکھوں بلائیں آتی ہیں عاجزؔ کی جان پر

ae hain bada nosh bari an ban par

mela laga hai pir-e-mughan ki dukan par

saqi ata ho ab mujhe saghar sharab ka

chhai hui hai kaisi ghata asman par

rote hain tere ishq mein ai rashk-e-mah jab

karte hain log khanda hamari fughan par

paida hua asar na kabhi meri ah mein

khaya na us ne rahm kabhi be zaban par

ai kash ye nasib karen itni yawari

pahunchun kabhi main shab ko tumhare makan par

kis shan se wo aj gae hain adu ke ghar

mujh se bigar ke pahunche hain wo asman par

allah shab-e-firaq mein wo ah-o-zariyan

har waqt sadme kaise hain mujh nim jan par

likha jo khat-e-shauq unhen main ne hijr mein

rone lage raqib bhi mere bayan par

ya rab tire hi fazl ka umidwar hun

khata nahin hai rahm koi natawan par

har dam tire firaq mein phirta hun so ba su

lakhon balaen ati hain ajiz ki jan par