آئینۂ خیال تھا عکس پذیر راز کا

آئینۂ خیال تھا عکس پذیر راز کا

طور شہید ہو گیا جلوۂ دل نواز کا

پایہ بہت کیا بلند اس نے حریم ناز کا

تا نا پہنچ سکے غبار رہ گزر نیاز کا

خستگیٔ کلیم نے نکتہ عجب سمجھا دیا

ورنہ حریف میں بھی تھا اس مژۂ دراز کا

دیر ملا تھا راہ میں کعبے کو ہم نکل گئے

جذبۂ شوق میں دماغ کس کو ہو امتیاز کا

بندگی اور صاحبی اصل میں دونوں ایک ہیں

جس کا غلام ایاز ہے وہ ہے غلام ایاز کا

گو تہی نصیب نے دور رکھا تو کیا ہوا

بندۂ خانہ زاد ہوں اس کے قد دراز کا

شوق ترا ہے موجزن ذوق ترا بہانہ جو

کھول نہ دیں بھرم کہیں پرد گیان راز کا

مستیٔ بے خودی سے یاں آنکھ کھلی نہ حشر تک

یعنی یہی جواب تھا نرگس نیم باز کا

آہ و فغاں کے ساتھ ساتھ چھا گئی ایک بے خودی

قطع زباں ضرور تھا شمع زباں دراز کا

خاک میں مل گئے ولے آنکھ اٹھی نہ شرم سے

ہم سے ہوا نہ حق ادا اس کی نگاہ ناز کا

مطرب خلد کیا سنائے وحشت خستہ کیا سنے

معتقد قدیم ہے زمزمہ حجاز کا

aina-e-khayal tha aks pazir raz ka

tur shahid ho gaya jalwa-e-dil nawaz ka

paya bahut kiya buland us ne harim-e-naz ka

ta na pahunch sake ghubar-e-rah guzar niyaz ka

khastagi-e-kalim ne nukta ajab samjha diya

warna harif mein bhi tha is mizha-e-daraz ka

der mila tha rah mein kaabe ko ham nikal gae

jazba-e-shauq mein dimagh kis ko ho imtiyaz ka

bandagi aur sahabi asl mein donon ek hain

jis ka ghulam ayaz hai wo hai ghulam ayaz ka

go tahi nasib ne dur rakha to kya hua

banda-e-khana zad hun us ke qad-e-daraz ka

shauq tira hai maujzan zauq tira bahana jo

khol na den bharam kahin parad giyan raz ka

masti-e-be khudi se yan ankh khuli na hashr tak

yaani yahi jawab tha nargis-e-nim baz ka

ah-o-fughan ke sath sath chha gai ek be khudi

qat-e-zaban zarur tha shama zaban daraz ka

khak mein mil gae wale ankh uthi na sharm se

ham se hua na haq ada us ki nigah-e-naz ka

mutrib khuld kya sunae wahshat khasta kya sune

motaqid-e-qadim hai zamzama hijaz ka