سنگ در بن کر بھی کیا حسرت مرے دل میں نہیں

سنگ در بن کر بھی کیا حسرت مرے دل میں نہیں

تیرے قدموں میں ہوں لیکن تیری محفل میں نہیں

راہ الفت کا نشاں یہ ہے کہ وہ ہے بے نشاں

جادہ کیسا نقش پا تک کوئی منزل میں نہیں

کھو چکے رو رو کے گھر باہر کی ساری کائنات

اشک کیسے آنکھ میں اب خون بھی دل میں نہیں

بزم آرائی سے پہلے دیکھ او نادان دیکھ

کون ہے محفل میں تیری کون محفل میں نہیں

پوچھتا ہے آرزو احسنؔ کی تو کیا بار بار

تیرے ملنے کے سوا کوئی ہوس دل میں نہیں

sang dar ban kar bhi kya hasrat mire dil mein nahin

tere qadmon mein hun lekin teri mahfil mein nahin

rah ulfat ka nishan ye hai ke wo hai be nishan

jada kaisa naqsh-e-pa tak koi manzil mein nahin

kho chuke ro ro ke ghar bahar ki sari kainat

ashk kaise ankh mein ab khun bhi dil mein nahin

bazm arai se pahle dekh o nadan dekh

kaun hai mahfil mein teri kaun mahfil mein nahin

puchhta hai arzu ahsan ki to kya bar bar

tere milne ke siwa koi hawas dil mein nahin