سو بار تم تو سامنے آ کر چلے گئے

سو بار تم تو سامنے آ کر چلے گئے

دھوکا سا ایک ہم کو دکھا کر چلے گئے

کی ہم سے باغباں نے یہ کاوش کہ آخرش

ہم آشیاں کو آگ لگا کر چلے گئے

ہونے دیا نہ مجھ سے تمہیں شرم نے دو چار

جب مل گئے تو سر کو جھکا کر چلے گئے

آتا ہوا جو دور سے دیکھا مجھے تو وے

رستے میں مجھ سے منہ کو چھپا کر چلے گئے

اب میں ہوں اور وہ زلف ہے یاران بے وفا

دام بلا میں مجھ کو پھنسا کر چلے گئے

ٹھوکر سے اپنے پانو کے گلشن میں خوش قداں

صد فتنہ ہائے خفتہ جگا کر چلے گئے

ہے غیر سے بھی ربط تمہیں میں جو یہ کہا

سوگند میرے سر کی وہ کھا کر چلے گئے

آئے کبھی جو باغ میں دیوانگان دشت

آنکھوں سے جوئے خون بہا کر چلے گئے

ہرگز رہا نہ ان کا نشاں وہ جو مصحفیؔ

قصر و محل زمیں پہ بنا کر چلے گئے

sau bar tum to samne a kar chale gae

dhoka sa ek ham ko dikha kar chale gae

ki ham se baghban ne ye kawish ke akhirash

ham ashiyan ko ag laga kar chale gae

hone diya na mujh se tumhen sharm ne do char

jab mil gae to sar ko jhuka kar chale gae

ata hua jo dur se dekha mujhe to we

raste mein mujh se munh ko chhupa kar chale gae

ab main hun aur wo zulf hai yaran-e-be wafa

dam-e-bala mein mujh ko phansa kar chale gae

thokar se apne paon ke gulshan mein khush qadan

sad fitna ha-e-khufta jaga kar chale gae

hai ghair se bhi rabt tumhen main jo ye kaha

saugand mere sar ki wo kha kar chale gae

ae kabhi jo bagh mein diwangan-e-dasht

ankhon se ju-e-khun baha kar chale gae

hargiz raha na un ka nishan wo jo mushafi

qasr-o-mahal zamin pe bana kar chale gae