سنگ در دیکھ کے سر یاد آیا

سنگ در دیکھ کے سر یاد آیا

کوئی دیوانہ مگر یاد آیا

پھر وہ انداز نظر یاد آیا

چاک دل تا بہ جگر یاد آیا

ذوق ارباب نظر یاد آیا

سجدہ بے منت سر یاد آیا

ہر تبسم پہ یہ کھاتا ہوں فریب

کہ انہیں دیدۂ تر یاد آیا

پھر ترا نقش قدم ہے درکار

سجدۂ راہ گزر یاد آیا

جمع کرتا ہوں غبار رہ دوست

سر شوریدہ مگر یاد آیا

ہائے وہ معرکۂ ناوک ناز

دل بچایا تو جگر یاد آیا

آئینہ اب نہیں دیکھا جاتا

میں بعنوان دگر یاد آیا

درد کو پھر ہے مرے دل کی تلاش

خانہ برباد کو گھر یاد آیا

اس کو بھولے تو ہوئے ہو فانیؔ

کیا کروگے وہ اگر یاد آیا

sang-e-dar dekh ke sar yad aya

koi diwana magar yad aya

phir wo andaz-e-nazar yad aya

chak-e-dil ta ba jigar yad aya

zauq-e-arbab-e-nazar yad aya

sajda be minnat-e-sar yad aya

har tabassum pe ye khata hun fareb

ke unhen dida-e-tar yad aya

phir tira naqsh-e-qadam hai darkar

sajda-e-rah guzar yad aya

jama karta hun ghubar-e-rah dost

sar-e-shorida magar yad aya

hae wo marka-e-nawak-e-naz

dil bachaya to jigar yad aya

aina ab nahin dekha jata

main baunwan-e-digar yad aya

dard ko phir hai mire dil ki talash

khana barbad ko ghar yad aya

us ko bhule to hue ho fani

kya karoge wo agar yad aya