سری کرشن

ہوا طلوع ستاروں کی دل کشی لے کر

سرور آنکھ میں نظروں میں زندگی لے کر

خودی کے ہوش اڑانے بصد نیاز آیا

نئے پیالوں میں صہبائے بے خودی لے کر

فضائے دہر میں گاتا پھرا وہ پریت کے گیت

نشاط خیز و سکوں ریز بانسری لے کر

جہان قلب سراپا گداز بن ہی گیا

ہر ایک ذرہ محبت کا ساز بن ہی گیا

جمال و حسن کے کافر نکھار سے کھیلا

ریاض عشق کی رنگیں بہار سے کھیلا

پیمبروں کی کبھی رسم کی ادا اس نے

گوالا بن کے کبھی سبزہ زار سے کھیلا

بہا دئے کبھی ٹھوکر سے پریم کے چشمے

کبھی جمن کبھی گنگا کی دھار سے کھیلا

ہنسی ہنسی میں وہ دکھ درد جھیلتا ہی رہا

کرشمہ باز زمانے سے کھیلتا ہی رہا

کیا زمانے کو معمور اپنے نغموں سے

سکھائے عشق کے دستور اپنے نغموں سے

صداقت اور محبت کی اس نے دی تعلیم

اندھیریوں میں بھرا نور اپنے نغموں سے

لطافتوں سے کیا ارض ہند کو لبریز

کثافتوں کو کیا دور اپنے نغموں سے

فلک کو یاد ہیں اس عہد پاک کی باتیں

وہ بانسری وہ محبت کی سانولی راتیں

دلوں میں رنگ محبت کو استوار کیا

سواد ہند کو گیتا سے نغمہ بار کیا

جو راز کوشش نطق و زباں سے کھل نہ سکا

وہ راز اپنی نگاہوں سے آشکار کیا

اداسیوں کو نئی زندگی عطا کر دی

ہر ایک ذرے کو دل دے کے بے قرار کیا

جو مشرب اس کا نہ اس طرح عام ہو جاتا

جہاں سے محو محبت کا نام ہو جاتا

hawa tulu sitaron ki dil kashi le kar

surur ankh mein nazron mein zindagi le kar

khudi ke hosh urane basad niyaz aya

nae pyalon mein sahbae be khudi le kar

faza-e-dahr mein gata phira wo prit ke git

nishat khez-o-sukun rez bansuri le kar

jahan-e-qalb sarapa gudaz ban hi gaya

har ek zarra mohabbat ka saz ban hi gaya

jamal-o-husn ke kafir nikhar se khela

riyaz-e-ishq ki rangin bahar se khela

payambaron ki kabhi rasm ki ada us ne

gawala ban ke kabhi sabza zar se khela

baha diye kabhi thokar se prem ke chashme

kabhi jaman kabhi ganga ki dhar se khela

hansi hansi mein wo dukh dard jhelta hi raha

karishma baz zamane se khelta hi raha

kiya zamane ko maamur apne naghmon se

sikhae ishq ke dastur apne naghmon se

sadaqat aur mohabbat ki us ne di taalim

andheriyon mein bhara nur apne naghmon se

latafaton se kiya arz-e-hind ko labrez

kasafaton ko kiya dur apne naghmon se

falak ko yad hain is ahd-e-pak ki baten

wo bansuri wo mohabbat ki sanwli raten

dilon mein rang-e-mohabbat ko ustuwar kiya

sawad-e-hind ko gita se naghma bar kiya

jo raz koshish nutq-o-zaban se khul na saka

wo raz apni nigahon se ashkar kiya

udasiyon ko nai zindagi ata kar di

har ek zarre ko dil de ke be qarar kiya

jo mashrab us ka na is tarah am ho jata

jahan se mahw-e-mohabbat ka nam ho jata