سرور افزا ہوئی آخر شراب آہستہ آہستہ

سرور افزا ہوئی آخر شراب آہستہ آہستہ

ہوا وہ بزم مے میں بے حجاب آہستہ آہستہ

رخ روشن سے یوں اٹھی نقاب آہستہ آہستہ

کہ جیسے ہو طلوع آفتاب آہستہ آہستہ

کیا جب شوق نے اس سے خطاب آہستہ آہستہ

حیا نے بھی دیا آخر جواب آہستہ آہستہ

وہ مستی خیز نظریں رفتہ رفتہ لے اڑیں مجھ کو

کیا کاشانۂ دل کو خراب آہستہ آہستہ

بڑھا ہنگامۂ شوق اس قدر بزم حریفاں میں

کہ رخصت ہو گیا اس کا حجاب آہستہ آہستہ

کیا کامل ہمیں اک عمر میں سوز محبت نے

ہوئے ہم آتش غم سے کباب آہستہ آہستہ

عبث تھا ضبط کا دعویٰ ستم اس کے ستم نکلے

نگاہیں ہو گئیں آخر پر آب آہستہ آہستہ

دبستان وفا میں عمر بھر کی صفحہ گردانی

سمجھ میں آئی الفت کی کتاب آہستہ آہستہ

بقدر شوق اسے تاب طپیدہ تھی کہاں قاتل

کیا بسمل نے تیرے اضطراب آہستہ آہستہ

بلا ہیں شاہدان شہر وحشتؔ مے پرستی میں

ہوا میں ان کی صحبت میں خراب آہستہ آہستہ

surur afza hui akhir sharab ahista ahista

hawa wo bazm-e-mai mein be hijab ahista ahista

rukh-e-raushan se yun uthi naqab ahista ahista

ke jaise ho tulu-e-aftab ahista ahista

kiya jab shauq ne us se khitab ahista ahista

haya ne bhi diya akhir jawab ahista ahista

wo masti khez nazren rafta rafta le uren mujh ko

kiya kashana-e-dil ko kharab ahista ahista

barha hangama-e-shauq is qadar bazm-e-harifan mein

ke rukhsat ho gaya us ka hijab ahista ahista

kiya kamil hamen ik umr mein soz-e-mohabbat ne

hue ham atish-e-gham se kabab ahista ahista

abas tha zabt ka daawa sitam us ke sitam nikle

nigahen ho gain akhir par ab ahista ahista

dabistan-e-wafa mein umr bhar ki safha gardani

samajh mein ai ulfat ki kitab ahista ahista

baqadr-e-shauq use tab-e-tapida thi kahan qatil

kya bismil ne tere iztirab ahista ahista

bala hain shahidan-e-shahr wahshat mai parasti mein

hawa mein un ki sohbat mein kharab ahista ahista