سلسلہ چھڑ گیا جب یاسؔ کے افسانے کا

سلسلہ چھڑ گیا جب یاسؔ کے افسانے کا

شمع گل ہو گئی دل بجھ گیا پروانے کا

عشق سے دل کو ملا آئنہ خانے کا شرف

جگمگا اٹھا کنول اپنے سیہ خانے کا

خلوت ناز کجا اور کجا اہل ہوس

زور کیا چل سکے فانوس سے پروانے کا

لاش کم بخت کی کعبے میں کوئی پھکوا دے

کوچۂ یار میں کیوں ڈھیر ہو پروانے کا

وائے حسرت کہ تعلق نہ ہوا دل کو کہیں

نہ تو کعبے کا ہوا میں نہ صنم خانے کا

تشنہ لب ساتھ چلے شوق میں سائے کی طرح

رخ کیا ابر بہاری نے جو مے خانے کا

واہ کس ناز سے آتا ہے ترا دور شباب

جس طرح دور چلے بزم میں پیمانے کا

اہل دل مست ہوئے پھیل گئی بوئے وفا

پیرہن چاک ہوا جب ترے دیوانے کا

سر شوریدہ کجا عشق کی بیگار کجا

مگر اللہ رے دل آپ کے دیوانے کا

دیکھ کر آئنے میں چاک گریباں کی بہار

اور بگڑا ہے مزاج آپ کے دیوانے کا

کیا عجب ہے جو حسینوں کی نظر لگ جائے

خون ہلکا ہے بہت آپ کے دیوانے کا

آپ اب شمع سحر بڑھ کے گلے ملتی ہے

بخت جاگا ہے بڑی دیر میں پروانے کا

دل بے حوصلہ تکتا ہے خریدار کی راہ

کوئی گاہک نہیں ٹوٹے ہوئے پیمانے کا

بزم میں صبح ہوئی چھا گیا اک سناٹا

سلسلہ چھڑ گیا جب آپ کے افسانے کا

silsila chhir gaya jab yas ke afsane ka

shama gul ho gai dil bujh gaya parwane ka

ishq se dil ko mila aina khane ka sharaf

jagmaga utha kanwal apne siyah khane ka

khalwat-e-naz kuja aur kuja ahl-e-hawas

zor kya chal sake fanus se parwane ka

lash kam bakht ki kaabe mein koi phakwa de

kucha-e-yar mein kyun dher ho parwane ka

wae hasrat ke taalluq na hua dil ko kahin

na to kaabe ka hawa mein na sanam khane ka

tishna lab sath chale shauq mein sae ki tarah

rukh kiya abr-e-bahari ne jo mai khane ka

wah kis naz se ata hai tira daur-e-shabab

jis tarah dur chale bazm mein paimane ka

ahl-e-dil mast hue phail gai bu-e-wafa

pairahan chak hua jab tire diwane ka

sar-e-shorida kuja ishq ki begar kuja

magar allah re dil ap ke diwane ka

dekh kar aine mein chak-e-gareban ki bahar

aur bigra hai mizaj ap ke diwane ka

kya ajab hai jo hasinon ki nazar lag jae

khun halka hai bahut ap ke diwane ka

ap ab sham-e-sahar barh ke gale milti hai

bakht jaga hai bari der mein parwane ka

dil-e-be hausla takta hai kharidar ki rah

koi gahak nahin tute hue paimane ka

bazm mein subh hui chha gaya ik sannata

silsila chhir gaya jab ap ke afsane ka