سرو قد لالہ رخ و غنچہ دہن یاد آیا

سرو قد لالہ رخ و غنچہ دہن یاد آیا

پھر بہار آئی مجھے لطف چمن یاد آیا

گو کہ تھی سلطنت مصر مگر آخر کار

اس حکومت پہ بھی یوسف کو وطن یاد آیا

رگ گل پر ہے کبھی اور کبھی غنچہ پہ نگاہ

باغ میں کس کی کمر کس کا دہن یاد آیا

سفر ملک عدم کی ہوئی ایسی عجلت

زاد رہ کچھ نہ بجز گور و کفن یاد آیا

صحبت لالہ رخاں عہد شباب و شب وصل

مئے کہنہ جو ملی داغ کہن یاد آیا

جب سے آیا ہے نظر یہ ترا حسن بے داغ

کبک کو ماہ نہ بلبل کو چمن یاد آیا

تیرے سودائی کو پھر جوش ہوا وحشت کا

قیدیٔ زلف کو پھر طوق و رسن یاد آیا

پان کھا کر جو اگال آپ نے تھوکا صاحب

جوہری محو ہوے لعل یمن یاد آیا

بعد مدت کے طلب آپ نے بندہ کو کیا

شکر صد شکر میں اے مشفق من یاد آیا

فصل گل آتے ہی آغاؔ نے بھی وحشت کی لی

کیسی یہ چال چلا کس کا چلن یاد آیا

sarw qad lala rukh-o-ghuncha dahan yad aya

phir bahar ai mujhe lutf-e-chaman yad aya

go ke thi saltanat-e-misr magar akhir kar

is hukumat pe bhi yusuf ko watan yad aya

rag-e-gul par hai kabhi aur kabhi ghuncha pe nigah

bagh mein kis ki kamar kis ka dahan yad aya

safar-e-mulk-e-adam ki hui aisi ujlat

zad rah kuchh na bajuz gor-o-kafan yad aya

sohbat-e-lala rukhan ahd-e-shabab-o-shab wasl

mai-e-kohna jo mili dagh-e-kuhan yad aya

jab se aya hai nazar ye tira husn-e-be dagh

kabk ko mah na bulbul ko chaman yad aya

tere saudai ko phir josh hua wahshat ka

qaidi-e-zulf ko phir tauq-o-rasan yad aya

pan kha kar jo ugal ap ne thuka sahab

jauhari mahw-e-hue laal-e-yaman yad aya

baad muddat ke talab ap ne banda ko kiya

shukr-e-sad shukr mein ai mushfiq-e-man yad aya

fasl-e-gul ate hi agha ne bhi wahshat ki li

kaisi ye chal chala kis ka chalan yad aya