آئے ہیں ہم جہاں میں غم لے کر

آئے ہیں ہم جہاں میں غم لے کر

دل پر خوں و چشم نم لے کر

ساغر مے کہاں ہے اے گردوں

کیا کریں تیرا جام جم لے کر

وعدہ اقسام کر چکا تو خلاف

اب کے چھوڑوں گا میں قسم لے کر

اس کی محفل سے کب اٹھے گا رقیب

یہ سعادت بھرے قدم لے کر

تر و خشک جہاں پہ قانع رہ

دست دوراں سے بیش و کم لے کر

سر سے مارا کریں پڑے اپنے

گو شہاں طبل اور علم لے کر

راہ میں تیری ضعف سے حسرتؔ

چلے ہر ہر قدم میں دم لے کر

ae hain ham jahan mein gham le kar

dil pur khun-o-chashm-e-nam le kar

saghar-e-mai kahan hai ai gardun

kya karen tera jam-e-jam le kar

waada aqsam kar chuka to khilaf

ab ke chhorunga mein qasam le kar

us ki mahfil se kab uthega raqib

ye saadat bhare qadam le kar

tar-o-khushk jahan pe qane rah

dast-e-dauran se besh-o-kam le kar

sar se mara karen pare apne

go shahan tabal aur ilm le kar

rah mein teri zof se hasrat

chale har har qadam mein dam le kar