سلامت رہیں دل میں گھر کرنے والے

سلامت رہیں دل میں گھر کرنے والے

اس اجڑے مکاں میں بسر کرنے والے

گلے پر چھری کیوں نہیں پھیر دیتے

اسیروں کو بے بال و پر کرنے والے

اندھیرے اجالے کہیں تو ملیں گے

وطن سے ہمیں در بدر کرنے والے

گریباں میں منہ ڈال کر خود تو دیکھیں

برائی پہ میری نظر کرنے والے

اس آئینہ خانے میں کیا سر اٹھاتے

حقیقت پر اپنی نظر کرنے والے

بہار دو روزہ سے دل کیا بہلتا

خبر کر چکے تھے خبر کرنے والے

کھڑے ہیں دوراہے پہ دیر و حرم کے

تری جستجو میں سفر کرنے والے

سر شام گل ہو گئی شمع بالیں

سلامت ہیں اب تک سحر کرنے والے

کجا صحن عالم کجا کنج مرقد

بسر کر رہے ہیں بسر کرنے والے

یگانہؔ وہی فاتح لکھنؤ ہیں

دل سنگ و آہن میں گھر کرنے والے

salamat rahen dil mein ghar karne wale

is ujre makan mein basar karne wale

gale par chhuri kyun nahin pher dete

asiron ko be bal-o-par karne wale

andhere ujale kahin to milenge

watan se hamen dar badar karne wale

gareban mein munh dal kar khud to dekhen

burai pe meri nazar karne wale

is aina khane mein kya sar uthate

haqiqat par apni nazar karne wale

bahar do roza se dil kya bahalta

khabar kar chuke the khabar karne wale

khare hain dorahe pe dair-o-haram ke

tiri justuju mein safar karne wale

sar-e-sham-e-gul ho gai sham-e-balin

salamat hain ab tak sahar karne wale

kuja sehn-e-alam kuja kunj-e-marqad

basar kar rahe hain basar karne wale

yagana wahi fateh-e-lakhnau hain

dil-e-sang-o-ahan mein ghar karne wale