سر رہ اب نہ یوں مجھ کو پکارو تم ہی آ جاؤ

سر رہ اب نہ یوں مجھ کو پکارو تم ہی آ جاؤ

ذرا زحمت تو ہوگی راز دارو تم ہی آ جاؤ

کہیں ایسا نہ ہو دم توڑ دیں حسرت سے دیوانے

قفس تک ان سے ملنے کو بہارو تم ہی آ جاؤ

بھروسا کیا سفینے کا کئی طوفان حائل ہیں

ہماری نا خدائی کو کنارو تم ہی آ جاؤ

ابھی تک وہ نہیں آئے یقیناً رات باقی ہے

ہماری غم گساری کو ستارو تم ہی آ جاؤ

شکیبؔ غم زدہ کو درد سے ہے اب کہاں فرصت

اگر کچھ وقت مل جائے تو پیارو تم ہی آ جاؤ

sar-e-rah ab na yun mujh ko pukaro tum hi a jao

zara zahmat to hogi raz daru tum hi a jao

kahin aisa na ho dam tor den hasrat se diwane

qafas tak un se milne ko buharu tum hi a jao

bharosa kya safine ka kai tufan hail hain

hamari na khudai ko kanaro tum hi a jao

abhi tak wo nahin ae yaqinan rat baqi hai

hamari gham gusari ko sitaro tum hi a jao

shakeb gham zada ko dard se hai ab kahan fursat

agar kuchh waqt mil jae to pyaro tum hi a jao