سر عرش بریں ہے زیر پائے پیر میخانہ
ساحر دہلویسر عرش بریں ہے زیر پائے پیر میخانہ
کمال اوج پر ہے حسن عالمگیر مے خانہ
فروغ بادہ سے روشن ہوئی تقدیر مے خانہ
کہ ہے ہر بادہ کش روشن چراغ پیر مے خانہ
میں دیوانہ ہوں اور دیر و حرم سے مجھ کو وحشت ہے
پڑی رہنے دو میرے پاؤں میں زنجیر مے خانہ
تصور دل میں رہتا ہے کسی کی چشم مے گوں کا
کھینچی رہتی ہے آنکھوں میں مرے تصویر مے خانہ
زیارت کو چلے ہیں شیخ و زاہد فی امان اللہ
خدا کی شان ہے کچھ پھر گئی تقدیر مے خانہ
پری شیشے میں اور ساغر میں ہے خورشید نورنگیں
وہ ہے تسخیر مے خانہ یہ ہے تنویر مے خانہ
جو پہنچا مے کدہ میں چھوڑ کر دیر و حرم ساحرؔ
جھکا سر ذوق مستی میں زہے تاثیر مے خانہ
sar-e-arsh-e-barin hai zer-e-pae pir-e-maikhana
kamal-e-auj par hai husn-e-alamgir mai khana
farogh-e-bada se raushan hui taqdir-e-mai khana
ke hai har bada kash raushan charagh-e-pir-e-mai khana
main diwana hun aur dair-o-haram se mujh ko wahshat hai
pari rahne do mere paon mein zanjir mai khana
tasawwur dil mein rahta hai kisi ki chashm-e-mai gun ka
khinchi rahti hai ankhon mein mire taswir mai khana
ziyarat ko chale hain shaikh-o-zahid fi aman allah
khuda ki shan hai kuchh phir gai taqdir-e-mai khana
pari shishe mein aur saghar mein hai khurshid naurangen
wo hai taskhir-e-mai khana ye hai tanwir mai khana
jo pahuncha mai kada mein chhor kar dair-o-haram sahir
jhuka sar zauq-e-masti mein zahe tasir mai khana