سحر جیتے گی یا شام غریباں دیکھتے رہنا

سحر جیتے گی یا شام غریباں دیکھتے رہنا

یہ سر جھکتے ہیں یا دیوار زنداں دیکھتے رہنا

ہر اک اہل لہو نے بازیٔ ایماں لگا دی ہے

جو اب کی بار ہوگا وہ چراغاں دیکھتے رہنا

ادھر سے مدعی گزریں گے ایقان شریعت کے

نظر آ جائے شاید کوئی انساں دیکھتے رہنا

اسے تم لوگ کیا سمجھو گے جیسا ہم سمجھتے ہیں

مگر پھر بھی کریں گے اس سے پیماں دیکھتے رہنا

سمجھ میں آ گیا تیری نگاہوں کے الجھنے پر

بھری محفل میں سب کا ہم کو حیراں دیکھتے رہنا

ہزاروں مہرباں اس راستے پر ساتھ آئیں گے

میاں یہ دل ہے یہ جیب و گریباں دیکھتے رہنا

دبا رکھو یہ لہریں ایک دن آہستہ آہستہ

یہی بن جائیں گی تمہید طوفاں دیکھتے رہنا

sahar jitegi ya sham-e-ghariban dekhte rahna

ye sar jhukte hain ya diwar-e-zindan dekhte rahna

har ik ahl-e-lahu ne bazi-e-iman laga di hai

jo ab ki bar hoga wo charaghan dekhte rahna

idhar se muddai guzrenge iqan shariat ke

nazar a jae shayad koi insan dekhte rahna

use tum log kya samjhoge jaisa ham samajhte hain

magar phir bhi karenge us se paiman dekhte rahna

samajh mein a gaya teri nigahon ke ulajhne par

bhari mahfil mein sab ka ham ko hairan dekhte rahna

hazaron mehrban is raste par sath aenge

miyan ye dil hai ye jeb-o-gareban dekhte rahna

daba rakho ye lahren ek din ahista ahista

yahi ban jaengi tamhid tufan dekhte rahna