سر کو نوشہ کے مرے شاہ نے باندھا سہرا

سر کو نوشہ کے مرے شاہ نے باندھا سہرا

سورۂ نور کا دکھلاتا ہے جلوہ سہرا

ریش یعقوب نے رکھی ہے رخ یوسف پر

چشم بد دور کہ ہے زلف زلیخا سہرا

باغ الفت سے حسینوں نے جو کلیاں بینی

اس پری کے لئے پریوں نے بنایا سہرا

جدولیں سونے کی یاقوت رقم نے کھینچی

یا ہے مصحف پہ سر لوح مطلا سہرا

جلوۂ طور کا موسی کو گماں ہو جاتا

میرے نوشہ جو ذرا دیکھتے سر کا صحرا

شعلۂ حسن جو ان کا نہ چھپا سہرے میں

عجز سے آپ کو قدموں پہ گرایا سہرا

پوتے پڑپوتوں کے تم باندھیو سر کو سہرے

جیسا بابا نے تمہارے تمہیں باندھا سہرا

حب کا تعویذ بنے پھول ہر اک سہرے کا

وصل یار اس کو ہو جس نے ترا دیکھا سہرا

اوفتادہ بھی ہے یہ اور بڑا شوخ بھی ہے

گل رخسار کا لے لیتا ہے بوسہ سہرا

سہرا جو باندھتے ہیں ہند میں نوشاہوں کو

چشم بد کے لئے شاید ہے یہ نکلا سہرا

پنجۂ مہر سے زہرا نے بلائیں لے لیں

جب نسیمؔ چمن شوق نے لکھا سہرا

sar ko nosha ke mire shah ne bandha sehra

sura-e-nur ka dikhlata hai jalwa sehra

rish-e-yaaqub ne rakhi hai rukh-e-yusuf par

chashm-e-bad dur ke hai zulf-e-zulekha sehra

bagh-e-ulfat se hasinon ne jo kaliyan bini

us pari ke liye pariyon ne banaya sehra

jadwalen sone ki yaqut raqam ne khinchi

ya hai mushaf pe sar-e-lauh-e-mutalla sehra

jalwa-e-tur ka musa ko guman ho jata

mere nosha jo zara dekhte sar ka sahra

shola-e-husn jo un ka na chhupa sehre mein

ijz se ap ko qadmon pe giraya sehra

paute parputon ke tum bandhiyo sar ko sehre

jaisa baba ne tumhare tumhen bandha sehra

hub ka taawiz bane phul har ik sehre ka

wasl-e-yar us ko ho jis ne tira dekha sehra

ofatada bhi hai ye aur bara shokh bhi hai

gul-e-rukhsar ka le leta hai bosa sehra

sehra jo bandhte hain hind mein naushahon ko

chashm-e-bad ke liye shayad hai ye nikla sehra

panja-e-mehr se zahra ne balaen le len

jab nasim-e-chaman shauq ne likha sehra