سدا ہے فکر ترقی بلند بینوں کو

سدا ہے فکر ترقی بلند بینوں کو

ہم آسمان سے لائے ہیں ان زمینوں کو

پڑھیں درود نہ کیوں دیکھ کر حسینوں کو

خیال صنعت صانع ہے پاک بینوں کو

کمال فقر بھی شایاں ہے پاک بینوں کو

یہ خاک تخت ہے ہم بوریا نشینوں کو

لحد میں سوئے ہیں چھوڑا ہے شہ نشینوں کو

قضا کہاں سے کہاں لے گئی مکینوں کو

یہ جھریاں نہیں ہاتھوں پہ ضعف پیری نے

چنا ہے جامۂ اصلی کی آستینوں کو

لگا رہا ہوں مضامین نو کے پھر انبار

خبر کرو مرے خرمن کے خوشہ چینوں کو

بھلا تردد بے جا سے ان میں کیا حاصل

اٹھا چکے ہیں زمیندار جن زمینوں کو

انہیں کو آج نہیں بیٹھنے کی جا ملتی

معاف کرتے تھے جو لوگ کل زمینوں کو

یہ زائروں کو ملیں سرفرازیاں ورنہ

کہاں نصیب کہ چومیں ملک جبینوں کو

سجایا ہم نے مضامیں کے تازہ پھولوں سے

بسا دیا ہے ان اجڑی ہوئی زمینوں کو

لحد بھی دیکھیے ان میں نصیب ہو کہ نہ ہو

کہ خاک چھان کے پایا ہے جن زمینوں کو

زوال طاقت و موئے سپید و ضعف بصر

انہیں سے پائے بشر موت کے قرینوں کو

نہیں خبر انہیں مٹی میں اپنے ملنے کی

زمیں میں گاڑ کے بیٹھے ہیں جو دفینوں کو

خبر نہیں انہیں کیا بندوبست پختہ کی

جو غصب کرنے لگے غیر کی زمینوں کو

جہاں سے اٹھ گئے جو لوگ پھر نہیں ملتے

کہاں سے ڈھونڈ کے اب لائیں ہم نشینوں کو

نظر میں پھرتی ہے وہ تیرگی و تنہائی

لحد کی خاک ہے سرمہ مآل بینوں کو

خیال خاطر احباب چاہیئے ہر دم

انیسؔ ٹھیس نہ لگ جائے آبگینوں کو

sada hai fikr taraqqi buland bainon ko

ham asman se lae hain in zaminon ko

parhen durud na kyun dekh kar hasinon ko

khayal sanat-e-sane hai pak bainon ko

kamal-e-faqr bhi shayan hai pak bainon ko

ye khak takht hai ham boriya nashinon ko

lahad mein soe hain chhora hai shah nashinon ko

qaza kahan se kahan le gai makinon ko

ye jhiriyan nahin hathon pe zof-e-piri ne

chuna hai jama-e-asli ki astinon ko

laga raha hun mazamin-e-nau ke phir ambar

khabar karo mire khirman ke khosha chainon ko

bhala taraddud be ja se un mein kya hasil

utha chuke hain zamindar jin zaminon ko

unhen ko aj nahin baithne ki ja milti

muaf karte the jo log kal zaminon ko

ye zairon ko milen sarfaraziyan warna

kahan nasib ke chumen malak jabinon ko

sajaya ham ne mazamin ke taza phulon se

basa diya hai un ujri hui zaminon ko

lahad bhi dekhiye un mein nasib ho ke na ho

ke khak chhan ke paya hai jin zaminon ko

zawal taqat-o-mu-e-saped-o-zof basar

unhen se pae bashar maut ke qarinon ko

nahin khabar unhen mitti main apne milne ki

zamin mein gar ke baithe hain jo dafinon ko

khabar nahin unhen kya bandobast pukhta ki

jo ghasb karne lage ghair ki zaminon ko

jahan se uth gae jo log phir nahin milte

kahan se dhund ke ab laen ham nashinon ko

nazar mein phirti hai wo tirgi-o-tanhai

lahad ki khak hai surma maal-e-bainon ko

khayal-e-khatir-e-ahbab chahiye har dam

anis thes na lag jae abginon ko