سبزۂ خط ہے پیمبر رخ ہے قرآن بہار

سبزۂ خط ہے پیمبر رخ ہے قرآن بہار

تو ہے قبلہ تو ہے کعبہ تو ہے ایمان بہار

میرے رونے سے ہوئی فصل گلستان بہار

ہو گیا میزاب دیدہ میر سامان بہار

سرو کو جوگی سمجھ کر فال کھلوانے لگی

کیا خزاں میں رہتے ہیں بلبل کو ارمان بہار

شاخ گل جنبش کہاں کرتے ہیں متوالوں کی طرح

بلبلوں کے بوسے لے لیتے ہیں مستان بہار

ہجر بے امید وصلت میں کوئی جینا بھی ہے

بلبلوں کے ہوتے ہیں کچھ عہد و پیمان بہار

سرو کے مصرع کے معنی بلبلوں سے پوچھ لو

عندلیبوں سے سنو شرح گلستان بہار

زلف گل رو کے گلے مل کر جو آئے گی نسیمؔ

ہوگی سنبل افعیٔ گنج شہیدان بہار

sabza-e-khat hai payambar rukh hai quran-e-bahar

tu hai qibla to hai kaaba to hai iman-e-bahar

mere rone se hui fasl-e-gulistan-e-bahar

ho gaya mizab dida mir-e-saman-e-bahar

sarw ko jogi samajh kar fal khulwane lagi

kya khizan mein rahte hain bulbul ko arman-e-bahar

shakh-e-gul jumbish kahan karte hain matwalon ki tarah

bulbulon ke bose le lete hain mustan-e-bahar

hijr be ummid waslat mein koi jina bhi hai

bulbulon ke hote hain kuchh ahd-o-paiman-e-bahar

sarw ke misra ke maani bulbulon se puchh lo

andalibon se suno sharh-e-gulistan-e-bahar

zulf-e-gul ru ke gale mil kar jo aegi nasim

hogi sumbul afi-e-ganj-e-shahidan-e-bahar