ستم کامیاب نے مارا

ستم کامیاب نے مارا

کرم لا جواب نے مارا

خود ہوئی گم ہمیں بھی کھو بیٹھی

نگہ بازیاب نے مارا

زندگی تھی حجاب کے دم تک

برہمئ حجاب نے مارا

عشق کے ہر سکون آخر کو

حسن کے اضطراب نے مارا

خود نظر بن گئی حجاب نظر

ہائے اس بے حجاب نے مارا

میں ترا عکس ہوں کہ تو میرا

اس سوال و جواب نے مارا

کوئی پوچھے کہ رہ کے پہلو میں

تیر کیا اضطراب نے مارا

بچ رہا جو تری تجلی سے

اس کو تیرے حجاب نے مارا

اب نظر کو کہیں قرار نہیں

کاوش انتخاب نے مارا

سب کو مارا جگرؔ کے شعروں نے

اور جگرؔ کو شراب نے مارا

sitam kamyab ne mara

karam-e-la jawab ne mara

khud hui gum hamen bhi kho baithi

nigah-e-bazyab ne mara

zindagi thi hijab ke dam tak

barhami-e-hijab ne mara

ishq ke har sukun-e-akhir ko

husn ke iztirab ne mara

khud nazar ban gai hijab-e-nazar

hae us be hijab ne mara

main tira aks hun ke tu mera

is sawal-o-jawab ne mara

koi puchhe ke rah ke pahlu mein

tir kya iztirab ne mara

bach raha jo tiri tajalli se

us ko tere hijab ne mara

ab nazar ko kahin qarar nahin

kawish-e-intikhab ne mara

sab ko mara jigar ke sheron ne

aur jigar ko sharab ne mara