سبو پر جام پر شیشے پہ پیمانے پہ کیا گزری

سبو پر جام پر شیشے پہ پیمانے پہ کیا گزری

نہ جانے میں نے توبہ کی تو مے خانے پہ کیا گزری

ملیں تو فائزان منزل مقصود سے پوچھوں

گزر گاہ محبت سے گزر جانے پہ کیا گزری

کسی کو میرے کاشانے سے ہمدردی نہیں شاید

ہر اک یہ پوچھتا ہے میرے کاشانے پہ کیا گزری

نہ ہو جو زندگی انجام وہ وجدان ناقص ہے

حضور شمع بعد وجد پروانے پہ کیا گزری

بتائیں برہمن اور شیخ ان کی خانہ جنگی میں

خدا خانے پہ کیا بیتی صنم خانے پہ کیا گزری

تو اپنے ہی مآل سوز غم پر غور کر پہلے

تجھے اس سے نہیں کچھ بحث پروانے پہ کیا گزری

کسی حکمت سے کر دے کوئی گویا مرنے والوں کو

یہ راز اب تک ہے سربستہ کہ مر جانے پہ کیا گزری

تری ہر سو تجلی اور میری ہر طرف نظریں

تجھے تو یاد ہوگا آئینہ خانے پہ کیا گزری

زباں منہ میں ہے عرض حال کر تو نے تو دیکھا ہے

کہ خوئے ضبط و خاموشی سے پروانے پہ کیا گزری

وہ کہتا تھا خدا جانے بہار آئے تو کیا گزرے

خدا جانے بہار آئی تو دیوانے پہ کیا گزری

یہ ہے سیمابؔ اک نا گفتہ بہ افسانہ کیا کہیے

وطن سے کنج غربت میں چلے آنے پہ کیا گزری

subu par jam par shishe pe paimane pe kya guzri

na jane main ne tauba ki to mai khane pe kya guzri

milen to faizan manzil-e-maqsud se puchhun

guzar gah-e-mohabbat se guzar jane pe kya guzri

kisi ko mere kashane se hamdardi nahin shayad

har ik ye puchhta hai mere kashane pe kya guzri

na ho jo zindagi anjam wo wijdan-e-naqis hai

huzur-e-shama baad wajd parwane pe kya guzri

bataen barahman aur shaikh un ki khana jangi mein

khuda khane pe kya biti sanam khane pe kya guzri

tu apne hi maal-e-soz-e-gham par ghaur kar pahle

tujhe us se nahin kuchh bahs parwane pe kya guzri

kisi hikmat se kar de koi goya marne walon ko

ye raz ab tak hai sarbasta ke mar jane pe kya guzri

tiri har su tajalli aur meri har taraf nazren

tujhe to yad hoga aina khane pe kya guzri

zaban munh mein hai arz-e-hal kar tu ne to dekha hai

ke khu-e-zabt-o-khamoshi se parwane pe kya guzri

wo kahta tha khuda jane bahar ae to kya guzre

khuda jane bahar ai to diwane pe kya guzri

ye hai simab ik na gufta ba afsana kya kahiye

watan se kunj-e-ghurbat mein chale ane pe kya guzri