آپ ہیں بے گناہ کیا کہنا

آپ ہیں بے گناہ کیا کہنا

کیا صفائی ہے واہ کیا کہنا

اس سے حال تباہ کیا کہنا

جو کہے سن کے واہ کیا کہنا

حشر میں یہ انہیں نئی سوجھی

بن گئے داد خواہ کیا کہنا

عذر کرنا ستم کے بعد تمہیں

خوب آتا ہے واہ کیا کہنا

تم نہ روکو نگاہ کو اپنی

ہم کریں ضبط آہ کیا کہنا

تجھ سے اچھے کہاں زمانے میں

واہ اے رشک ماہ کیا کہنا

غیر پر لطف خاص کا اظہار

مجھ سے ٹیڑھی نگاہ کیا کہنا

غیر سے مانگ کر ثبوت وفا

بن گئے خود گواہ کیا کہنا

دل بھی لے کر نہیں یقین وفا

ہے ابھی اشتباہ کیا کہنا

بلبے چتون تری معاذ اللہ

اف رے ٹیڑھی نگاہ کیا کہنا

ان گنوں پر نجات کی امید

بیخودؔ رو سیاہ کیا کہنا

ap hain be gunah kya kahna

kya safai hai wah kya kahna

us se hal-e-tabah kya kahna

jo kahe sun ke wah kya kahna

hashr mein ye unhen nai sujhi

ban gae dad khwah kya kahna

uzr karna sitam ke baad tumhen

khub ata hai wah kya kahna

tum na roko nigah ko apni

ham karen zabt ah kya kahna

tujh se achchhe kahan zamane mein

wah ai rashk-e-mah kya kahna

ghair pur lutf khas ka izhar

mujh se terhi nigah kya kahna

ghair se mang kar subut-e-wafa

ban gae khud gawah kya kahna

dil bhi le kar nahin yaqin-e-wafa

hai abhi ishtibah kya kahna

balbe chitwan tiri maaz allah

uf re terhi nigah kya kahna

in ginon par najat ki ummid

bekhud ro siyah kya kahna