سب ہمارے لیے زنجیر لیے پھرتے ہیں

سب ہمارے لیے زنجیر لیے پھرتے ہیں

ہم سر زلف گرہ گیر لیے پھرتے ہیں

کون تھا صید وفادار کہ اب تک صیاد

بال و پر اس کے ترے تیر لیے پھرتے ہیں

تو جو آئے تو شب تار نہیں یاں ہر سو

مشعلیں نالۂ شب گیر لیے پھرتے ہیں

تیری صورت سے کسی کی نہیں ملتی صورت

ہم جہاں میں تری تصویر لیے پھرتے ہیں

معتکف گرچہ بظاہر ہوں تصور میں مگر

کو بہ کو ساتھ یہ بے پیر لیے پھرتے ہیں

رنگ خوبان جہاں دیکھتے ہی زرد کیا

آپ زور آنکھوں میں اکسیر لیے پھرتے ہیں

جو ہے مرتا ہے بھلا کس کو عداوت ہوگی

آپ کیوں ہاتھ میں شمشیر لیے پھرتے ہیں

سرکشی شمع کی لگتی نہیں گر ان کو بری

لوگ کیوں بزم میں گل گیر لیے پھرتے ہیں

تا گنہ گاری میں ہم کو کوئی مطعوں نہ کرے

ہاتھ میں نامۂ تقدیر لیے پھرتے ہیں

قصر تن کو یوں ہی بنوا یہ بگولے ناسخؔ

خوب ہی نقشۂ تعمیر لیے پھرتے ہیں

sab hamare liye zanjir liye phirte hain

ham sar-e-zulf-e-girah gir liye phirte hain

kaun tha said wafadar ke ab tak sayyad

bal-o-par us ke tire tir liye phirte hain

tu jo ae to shab-e-tar nahin yan har su

mashlen nala-e-shab gir liye phirte hain

teri surat se kisi ki nahin milti surat

ham jahan mein tiri taswir liye phirte hain

motakaf garche bazahir hun tasawwur mein magar

ku ba ku sath ye be pir liye phirte hain

rang khuban-e-jahan dekhte hi zard kiya

ap zor ankhon mein iksir liye phirte hain

jo hai marta hai bhala kis ko adawat hogi

ap kyun hath mein shamshir liye phirte hain

sarkashi shama ki lagti nahin gar un ko buri

log kyun bazm mein gul gir liye phirte hain

ta gunah gari mein ham ko koi matun na kare

hath mein nama-e-taqdir liye phirte hain

qasr-e-tan ko yun hi banwa ye bagule nasikh

khub hi naqsha-e-taamir liye phirte hain