زندگی ہوگی مری اے غم دوراں اک روز

زندگی ہوگی مری اے غم دوراں اک روز

میں سنواروں گا تری زلف پریشاں اک روز

گل کھلائے گی نئی موج بہاراں اک روز

ٹوٹ ہی جائیں گے قفل در زنداں اک روز

کتنے الجھے ہوئے حالات زمانہ ہیں ابھی

ہوں گے شانے پہ مرے گیسوئے جاناں اک روز

اہل زنداں سے یہ کہہ دو کہ ذرا صبر کریں

ہوگا ہر سمت گلستاں ہی گلستاں اک روز

آ کے اک روز جلاؤں گا مرادوں کے دئے

تیری محفل میں کروں گا میں چراغاں اک روز

جان دیتا ہوں ابھی عشق کے انداز پہ میں

حسن ہوگا مرے پہلو میں غزل خواں اک روز

کچھ اندھیرے ہیں ابھی راہ میں حائل اخترؔ

اپنی منزل پہ نظر آئے گا انساں اک روز

zindagi hogi miri ai gham-e-dauran ik roz

main sanwarunga tiri zulf-e-pareshan ik roz

gul khilaegi nai mauj-e-baharan ik roz

tut hi jaenge qufl-e-dar-e-zindan ik roz

kitne uljhe hue halat zamana hain abhi

honge shane pe mire gesu-e-janan ik roz

ahl-e-zindan se ye kah do ke zara sabr karen

hoga har samt gulistan hi gulistan ik roz

a ke ik roz jalaunga muradon ke diye

teri mahfil mein karunga mein charaghan ik roz

jan deta hun abhi ishq ke andaz pe main

husn hoga mire pahlu mein ghazal khwan ik roz

kuchh andhere hain abhi rah mein hail akhtar

apni manzil pe nazar aega insan ik roz