زنداں نصیب ہوں مرے قابو میں سر نہیں

زنداں نصیب ہوں مرے قابو میں سر نہیں

میرا سجود ان کے لیے معتبر نہیں

کیا ہے فریب نرگس غماز اگر نہیں

بے وجہ تو کشاکش قلب و جگر نہیں

تقسیم گل پہ بحث عنادل میں چھڑ گئی

گلزار لٹ رہا ہے کچھ اس کی خبر نہیں

لذت شناس غم کو ہے اظہار غم حرام

روتا ہوں اور دامن مژگاں بھی تر نہیں

میرے سجود شوق سے ہو جائے بے نیاز

اتنا بلند حوصلۂ سنگ در نہیں

یوں باغباں نے ہمت پرواز چھین لی

ایسی بھری بہار ہے اور ایک پر نہیں

تحسین ناشناس کا بھوکا نہیں سہیلؔ

میں آبرو فروش متاع ہنر نہیں

zindan nasib hun mire qabu mein sar nahin

mera sujud un ke liye motabar nahin

kya hai fareb-e-nargis-e-ghammaz agar nahin

be wajh to kashakash-e-qalb-o-jigar nahin

taqsim gul pe bahs-e-anadil mein chhir gai

gulzar lut raha hai kuchh us ki khabar nahin

lazzat shanas gham ko hai izhar-e-gham haram

rota hun aur daman-e-mizhgan bhi tar nahin

mere sujud-e-shauq se ho jae be niyaz

itna buland hausla-e-sang-e-dar nahin

yun baghban ne himmat-e-parwaz chhin li

aisi bhari bahar hai aur ek par nahin

tahsin-e-nashanas ka bhuka nahin sahel

main abru farosh mata-e-hunar nahin