زیر نقاب آب گوں ہائے رے ان کی جالیاں

زیر نقاب آب گوں ہائے رے ان کی جالیاں

ہم کو تو بس ڈبو گئیں نیل کے کٹرے والیاں

تیغ جو رکھی سان پر سدھ جو سنبھالی اس نے ٹک

وضعیں نئی تراشیاں طرزیں نئی نکالیاں

ہم پہ تو برسے صبح تک خنجر و تیغ و تیر ہی

ابر بلا سے کم نہیں ہجر کی راتیں کالیاں

شعلے کی جوں مدد کرے دود نخست خار و خس

مسی سے اور دھواں ہوئیں ہونٹوں کی اس کی لالیاں

موکمران باغ حسن لچکیں جو مثل شاخ بید

دل کو نہ کیوں ہلاویں پھر ان کی یہ نو نہالیاں

اک شرر آہ کا مری باعث شور و شر ہوا

جگنو کو دیکھ جس طرح لڑکے بجاویں تالیاں

صاحب نعمت اس طرح رہتے ہیں سب سے سرخ رو

سوئے زمیں جھکی رہیں میوے کی جیسے ڈالیاں

کس سے پڑھاوے کوئی خط انشا ہی جس کا ہو غلط

یعنی کہ اس نے بے نقط بھیجی ہیں لکھ کے گالیاں

کنج قفس میں باغ سے آئے تھے جو نئے اسیر

صوتیں انہوں کی ساری رات میرے جگر میں سالیاں

مصحفیؔ اس کی بزم میں بھوکے ہیں ناز کے جو لوگ

گالیوں کی جگہ انہوں ملتی ہیں کیا سہالیاں

zer-e-naqab ab gun hae re un ki jaliyan

ham ko to bas dubo gain nil ke katre waliyan

tegh jo rakhi san par sudh jo sambhali us ne tuk

wazen nai tarashiyan tarzen nai nikaliyan

ham pe to barse subh tak khanjar-o-tegh-o-tir hi

abr-e-bala se kam nahin hijr ki raten kaliyan

shole ki jun madad kare dud-e-nukhust khar-o-khas

missi se aur dhuan huin honton ki us ki laliyan

mukamaran bagh husn lachken jo misl-e-shakh-e-baid

dil ko na kyun hilawen phir un ki ye nau nihaliyan

ik sharar ah ka miri bais-e-shor-o-shar hua

jugnu ko dekh jis tarah larke bajawen taliyan

sahab-e-nemat is tarah rahte hain sab se surkh ru

su-e-zamin jhuki rahen mewe ki jaise daliyan

kis se parhawe koi khat insha hi jis ka ho ghalat

yaani ke us ne be naqat bheji hain likh ke galiyan

kunj-e-qafas mein bagh se ae the jo nae asir

sauten unhon ki sari rat mere jigar mein saliyan

mushafi us ki bazm mein bhuke hain naz ke jo log

galiyon ki jagah unhon milti hain kya sahaliyan