زیر زمیں رہوں کہ تہہ آسماں رہوں

زیر زمیں رہوں کہ تہہ آسماں رہوں

اے جستجوئے یار بتا میں کہاں رہوں

مصروف شکر نعمت پیر مغاں رہوں

اللہ مجھ کو یوں ہی پلائے جہاں رہوں

گھل کر بھی جانب در پیر غاں رہوں

موج شراب ناب بنوں اور رواں رہوں

یارب حریق شعلۂ عشق بتاں رہوں

دوزخ کی آگ لے کے مقیم جناں رہوں

ظالم یہ بزم حسن کا اچھا رواج ہے

تو شمع ہو کے بھی نہ جلے میں تپاں رہوں

اے چشم یار موت کا پہلو بچا کے تو

ایسی نگاہ ڈال کہ میں نیم جاں رہوں

آب حیات پی کے خضر کیا یہاں رہے

میں ٹھان لوں تو کچھ نہ پیوں اور یہاں رہوں

بن جائیں میری طرز فنا کی کہانیاں

ایسا مٹا کہ صاحب نام و نشاں رہوں

ساقی وہ خاص طور کی تعلیم دے مجھے

اس میکدے میں جاؤں تو پیر مغاں رہوں

مضطرؔ وجود ذات نے گھر تک بھی لے لیا

جب خود وہ ہر جگہ ہے تو اب میں کہاں رہوں

zer-e-zamin rahun ke tah-e-asman rahun

ai justuju-e-yar bata mein kahan rahun

masruf shukr-e-nemat-e-pir-e-mughan rahun

allah mujh ko yun hi pilae jahan rahun

ghul kar bhi janib dar-e-pir-e-ghan rahun

mauj-e-sharab-e-nab banun aur rawan rahun

yarab hariq shola-e-ishq-e-butan rahun

dozakh ki ag le ke muqim-e-janan rahun

zalim ye bazm-e-husn ka achchha riwaj hai

tu shama ho ke bhi na jale mein tapan rahun

ai chashm-e-yar maut ka pahlu bacha ke to

aisi nigah dal ke main nim jan rahun

ab-e-hayat pi ke khizar kya yahan rahe

main than lun to kuchh na piyun aur yahan rahun

ban jaen meri tarz-e-fana ki kahaniyan

aisa mita ke sahab-e-nam-o-nishan rahun

saqi wo khas taur ki taalim de mujhe

is maikade mein jaun to pir-e-mughan rahun

muztar wajud zat ne ghar tak bhi le liya

jab khud wo har jagah hai to ab main kahan rahun