زمزمہ کس کی زباں پر بہ دل شاد آیا

زمزمہ کس کی زباں پر بہ دل شاد آیا

منہ نہ کھولا تھا کہ پر باندھنے صیاد آیا

قد جو بوٹا سا ترا سرو رواں یاد آیا

غش پہ غش مجھ کو چمن میں تہ شمشاد آیا

لے اڑی دل کو سوئے دشت ہوائے وحشت

پھر یہ جھونکا مجھے کر دینے کو برباد آیا

کس قدر دل سے فراموش کیا عاشق کو

نہ کبھی آپ کو بھولے سے بھی میں یاد آیا

دل ہوا سرو گلستاں کے نظارے سے نہال

شجر قامت دل دار مجھے یاد آیا

ہو گئی قطع اسیری میں امید پرواز

اڑ گئے ہوش جو پر کاٹنے صیاد آیا

ہو گیا حسرت پرواز میں دل سو ٹکڑے

ہم نے دیکھا جو قفس کو تو فلک یاد آیا

zamzama kis ki zaban par ba dil-e-shad aya

munh na khola tha ke par bandhne sayyad aya

qad jo buta sa tira sarw-e-rawan yad aya

ghash pe ghash mujh ko chaman mein tah-e-shamshad aya

le uri dil ko su-e-dasht hawa-e-wahshat

phir ye jhonka mujhe kar dene ko barbad aya

kis qadar dil se faramosh kiya ashiq ko

na kabhi ap ko bhule se bhi main yad aya

dil hua sarw gulistan ke nazare se nihal

shajar-e-qamat-e-dil dar mujhe yad aya

ho gai qat-e-asiri mein ummid-e-parwaz

ur gae hosh jo par katne sayyad aya

ho gaya hasrat-e-parwaz mein dil sau tukre

ham ne dekha jo qafas ko to falak yad aya