زیر زمیں ہوں تشنۂ دیدار یار کا

زیر زمیں ہوں تشنۂ دیدار یار کا

عالم وہی ہے آج تلک انتظار کا

گزرا شراب پینے سے لے کون درد سر

ساقی دماغ کس کو ہے رنج خمار کا

محشر کے روز بھی نہ کھلے گی ہماری آنکھ

صدمہ اٹھا چکے ہیں شب انتظار کا

عبرت کی جا ہے عالم دنیا نہ کر غرور

سر کاسۂ گدا ہے کسی تاجدار کا

بعد فنا بھی ہے مرض عشق کا اثر

دیکھو کہ رنگ زرد ہے میرے غبار کا

الفت نہ کچھ پری سے نہ کچھ حور سے ہے عشق

مشتاق برقؔ روز ازل سے ہے یار کا

zer-e-zamin hun tishna-e-didar-e-yar ka

alam wahi hai aj talak intizar ka

guzra sharab pine se le kaun dard-e-sar

saqi dimagh kis ko hai ranj-e-khumar ka

mahshar ke roz bhi na khulegi hamari ankh

sadma utha chuke hain shab-e-intizar ka

ibrat ki ja hai alam-e-duniya na kar ghurur

sar kasa-e-gada hai kisi tajdar ka

baad-e-fana bhi hai maraz-e-ishq ka asar

dekho ke rang-e-zard hai mere ghubar ka

ulfat na kuchh pari se na kuchh hur se hai ishq

mushtaq barq roz-e-azal se hai yar ka