زندے وہی ہیں جو کہ ہیں تم پر مرے ہوے

زندے وہی ہیں جو کہ ہیں تم پر مرے ہوے

باقی جو ہیں سو قبر میں مردے بھرے ہوئے

مست الست قلزم ہستی میں آئے ہیں

مثل حباب اپنا پیالہ بھرے ہوئے

اللہ رے صفائے تن نازنین یار

موتی ہیں کوٹ کوٹ کے گویا بھرے ہوئے

دو دن سے پاؤں جو نہیں دبوائے یار نے

بیٹھے ہیں ہاتھ ہاتھ کے اوپر دھرے ہوئے

ان ابروؤں کے حلقہ میں وہ انکھڑیاں نہیں

دو طاق پر ہیں دو گل نرگس دھرے ہوئے

بعد فنا بھی آئے گی مجھ مست کو نہ نیند

بے خشت خم لحد میں سرہانے دھرے ہوئے

نکلیں جو اشک بے اثر آنکھوں سے کیا عجب

پیدا ہوئے ہیں طفل ہزاروں مرے ہوئے

لکھے گئے بیاضوں میں اشعار انتخاب

رائج رہے وہی کہ جو سکے کھرے ہوئے

الٹا صفوں کو تیغ نے ابروئے یار کی

تیر مژہ سے درہم و برہم پرے ہوئے

آتشؔ خدا نے چاہا تو دریائے عشق میں

کودے جو اب کی ہم تو ورے سے پرے ہوئے

zinde wahi hain jo ke hain tum par mire hue

baqi jo hain so qabr mein murde bhare hue

mast-e-alast qulzum-e-hasti mein ae hain

misl-e-habab apna pyala bhare hue

allah re safa-e-tan naznin-e-yar

moti hain kot kot ke goya bhare hue

do din se paon jo nahin dabwae yar ne

baithe hain hath hath ke upar dhare hue

un abruon ke halqa mein wo ankhriyan nahin

do taq par hain do gul-e-nargis dhare hue

baad-e-fana bhi aegi mujh mast ko na nind

be khisht kham lahad mein sirhane dhare hue

niklen jo ashk-e-be asar ankhon se kya ajab

paida hue hain tifl-e-hazaron mire hue

likhe gae bayazon mein ashar intikhab

raij rahe wahi ke jo sake khare hue

ulta safon ko tegh ne abru-e-yar ki

tir-e-mizha se dirham-o-barham pare hue

atish khuda ne chaha to dariya-e-ishq mein

kude jo ab ki ham to ware se pare hue