ساز ہستی کی صدا عرش بریں تک پہنچے

ساز ہستی کی صدا عرش بریں تک پہنچے

اے خوشا جنس امانت کہ امیں تک پہنچے

ہائے وہ شان تغافل کہ ہے مجھ سے مخصوص

ہائے وہ عرض تمنا کہ تمہیں تک پہنچے

منزلیں اور بھی تھیں منزل جاناں کے سوا

ہم بہ محرومیٔ تقدیر وہیں تک پہنچے

ہاتھ میں مشعل خورشید جلو میں تارے

کس تکلف سے ہم اس ماہ جبیں تک پہنچے

اے خدا وہم غلط کار کو دے اذن جنوں

کہ خرد مرحلۂ ذوق یقیں تک پہنچے

اپنی افتاد کی روداد یہ ہے اہل نظر

سوئے افلاک رواں تھے کہ زمیں تک پہنچے

ہم خرابات نشینوں کا وہ عالی ہے مقام

کہ جو کم ظرف رہے تخت و نگیں تک پہنچے

پہلے فردوس کی محفل سے نکالے گئے ہم

پھر تری محفل فردوس قریں تک پہنچے

دولت دیں پہ بہت ناز ہے مجھ کو عابدؔ

کاش یہ بات کسی دشمن دیں تک پہنچے

saz-e-hasti ki sada arsh-e-barin tak pahunche

ai khusha jins-e-amanat ke amin tak pahunche

hae wo shan-e-taghaful ke hai mujh se makhsus

hae wo arz-e-tamanna ke tumhen tak pahunche

manzilen aur bhi thin manzil janan ke siwa

ham ba mahrumi-e-taqdir wahin tak pahunche

hath mein mashal-e-khurshid jilau mein tare

kis takalluf se ham us mah-e-jabin tak pahunche

ai khuda wahm-e-ghalat kar ko de izn-e-junun

ke khirad marhala-e-zauq-e-yaqin tak pahunche

apni uftad ki rudad ye hai ahl-e-nazar

su-e-aflak rawan the ke zamin tak pahunche

ham kharabat nashinon ka wo ali hai maqam

ke jo kam zarf rahe takht-o-nagin tak pahunche

pahle firdaus ki mahfil se nikale gae ham

phir tiri mahfil-e-firdaus qarin tak pahunche

daulat den pe bahut naz hai mujh ko abid

kash ye bat kisi dushman den tak pahunche