آ کدھر ہے تو ساقیٔ مخمور — سردار گینڈا سنگھ مشرقی

Arooz is now on the App Store, for iPhone and iPad. Download →

سردار گینڈا سنگھ مشرقی

آ کدھر ہے تو ساقیٔ مخمور

بھر کے دے جام بادۂ انگور

کوئی جام شراب ایسا پلا

جس سے شادی کرے دل رنجور

رنج گیتی سے دل مکدر ہے

بھر کے دے مے سے ساغر بلور

آج یوم ظفر دوشہرا ہے

طالب عیش ہے دل جمہور

مار کر دیو‌ بد کو لنکا سے

رام آئے مظفر و منصور

رام و سیتا اودھ میں جب آئے

دل کوشلیا ہوا مسرور

تخت لنکا دیا ویبھیشن کو

جب ہوا قتل راون‌ مقہور

دل سمترا کا بھی ہوا خورسند

دیکھا لچھمن کا جب رخ پر نور

کاش دشرتھ بھی زندہ ہوتے آج

تھا نہ ایشور کو یہ مگر منظور

دوستوں کو یہ دن مبارک ہو

ہو مبارک انہیں یہ عیش و سرور

سال پوچھے اگر کوئی کہہ دو

آج مارا ہے راون مغرور