آ گیا جب سے نظر وہ شوخ ہرجائی مجھے

آ گیا جب سے نظر وہ شوخ ہرجائی مجھے

کو بہ کو در در لیے پھرتی ہے رسوائی مجھے

کام عاشق کو کسی کی عیب بینی سے نہیں

حسن بینی کو خدا نے دی ہے بینائی مجھے

جور سہتا ہوں بتوں کے ناتوانی کے سبب

دل اٹھا لوں اس قدر کب ہے توانائی مجھے

جس طرح آتا ہے پیری میں جوانی کا خیال

وصل کی شب یاد روز ہجر میں آئی مجھے

گنتی ایک اک نام کی ہر گور میں مردے ہیں دفن

بعد مردن بھی ہوئی دشوار تنہائی مجھے

مثل ساغر بزم عالم میں میں کب خنداں ہوا

کس لیے دیتا ہے گردش چرخ مینائی مجھے

عین دانائی ہے ناسخؔ عشق میں دیوانگی

آپ سودائی ہیں جو کہتے ہیں سودائی مجھے

a gaya jab se nazar wo shokh harjai mujhe

ku ba ku dar dar liye phirti hai ruswai mujhe

kam ashiq ko kisi ki aib bini se nahin

husn bini ko khuda ne di hai binai mujhe

jaur sahta hun buton ke natawani ke sabab

dil utha lun is qadar kab hai tawanai mujhe

jis tarah ata hai piri mein jawani ka khayal

wasl ki shab yad roz-e-hijr mein ai mujhe

ginti ek ik nam ki har gor mein murde hain dafn

baad murdan bhi hui dushwar tanhai mujhe

misl-e-saghar bazm-e-alam mein main kab khandan hua

kis liye deta hai gardish charkh-e-minai mujhe

ain danai hai nasikh ishq mein diwangi

ap saudai hain jo kahte hain saudai mujhe