ساقی کوثر کے پیارے السلام

ساقی کوثر کے پیارے السلام

تشنہ لب سید ہمارے السلام

صبح تیرے قتل کی تھی صبح قیر

شام کے لوگوں کے مارے السلام

آسماں خم ہے تری تعظیم میں

تیرے ساجد ہیں ستارے السلام

تھے ہزاروں خصم جانی اس طرف

تم گئے بیکس بچارے السلام

فوج دشمن کی جو چڑھ آئی تمام

تم ہوئے ایک ایک اتارے السلام

بحر خوں میں غرق ہو چھوٹے بڑے

لگ گئے تم سب کنارے السلام

گور میں لاشیں تمھاری بے نماز

تم امام دیں تھے سارے السلام

راہ حق میں تجھ سے جانبازی ہوئی

بے خطر سر دینے ہارے السلام

کیا کہے اب میرؔ غم کش اس سوا

کاے ہمیشہ کے دکھارے السلام

saqi kausar ke pyare alssalam

tishna lab sayyad hamare alssalam

subh tere qatl ki thi subh qir

sham ke logon ke mare alssalam

asman kham hai tiri taazim mein

tere sajid hain sitare alssalam

the hazaron khasm jani is taraf

tum gae bekas bachare alssalam

fauj dushman ki jo charh ai tamam

tum hue ek ek utare alssalam

bahr-e-khun mein gharq ho chhote bare

lag gae tum sab kinare alssalam

gor mein lashen tumhari be namaz

tum imam den the sare alssalam

rah-e-haq mein tujh se janbazi hui

be khatar sar dene hare alssalam

kya kahe ab mir-e-gham kash is siwa

kae hamesha ke dukhare alssalam