سازگار ہے ہم دم ان دنوں جہاں اپنا — مجاز لکھنوی (Majaz Lakhnawi)

سازگار ہے ہم دم ان دنوں جہاں اپنا

عشق شادماں اپنا شوق کامراں اپنا

آہ بے اثر کس کی نالہ نارسا کس کا

کام بارہا آیا جذبۂ نہاں اپنا

کب کیا تھا اس دل پر حسن نے کرم اتنا

مہرباں اور اس درجہ کب تھا آسماں اپنا

الجھنوں سے گھبرائے مے کدے میں در آئے

کس قدر تن آساں ہے ذوق رائیگاں اپنا

کچھ نہ پوچھ اے ہم دم ان دنوں مرا عالم

مطرب حسیں اپنا ساقی جواں اپنا

عشق اور رسوائی کون سی نئی شے ہے

عشق تو ازل سے تھا رسوائے جہاں اپنا

تم مجازؔ دیوانے مصلحت سے بیگانے

ورنہ ہم بنا لیتے تم کو رازداں اپنا