آنکھوں کو پھوڑ ڈالوں یا دل کو توڑ ڈالوں

آنکھوں کو پھوڑ ڈالوں یا دل کو توڑ ڈالوں

یا عشق کی پکڑ کر گردن مروڑ ڈالوں

یک قطرہ خوں بغل میں ہے دل مری سو اس کو

پلکوں سے تیری خاطر کیوں کر نچوڑ ڈالوں

وہ آہوئے رمیدہ مل جائے تیرہ شب گر

کتا بنوں شکاری اس کو بھنبھوڑ ڈالوں

خیاط نے قضا کے جامہ سیا جو میرا

آیا نہ جی میں اتنا کیا اس میں جوڑ ڈالوں

وہ سنگ دل ہوا ہے اک سنگ دل پہ عاشق

آتا ہے جی میں سر کو پتھروں سے پھوڑ ڈالوں

بیٹھا ہوں خالی آخر اے آنسوؤ کروں کیا

دو چار گوکھرو ہی لاؤ نہ موڑ ڈالوں

تقصیر مصحفیؔ کی ہووے معاف صاحب

فرماؤ تو تمہارے لا اس کو گوڑ ڈالوں

ankhon ko phor dalun ya dil ko tor dalun

ya ishq ki pakar kar gardan maror dalun

yak qatra khun baghal mein hai dil miri so us ko

palkon se teri khatir kyun kar nichor dalun

wo ahu-e-ramida mil jae tira shab gar

kutta banun shikari us ko bhambhur dalun

khayyat ne qaza ke jama siya jo mera

aya na ji mein itna kya is mein jor dalun

wo sang dil hua hai ik sang dil pe ashiq

ata hai ji mein sar ko pattharon se phor dalun

baitha hun khali akhir ai ansoo karun kya

do char gokharo hi lao na mor dalun

taqsir mushafi ki howe muaf sahab

farmao to tumhare la us ko gor dalun