سب میں ہوں پھر کسی سے سروکار بھی نہیں

سب میں ہوں پھر کسی سے سروکار بھی نہیں

غافل اگر نہیں ہوں تو ہشیار بھی نہیں

قیمت اگر وہ دیتے ہیں تکرار بھی نہیں

کچھ ہم کو دل کے دینے میں انکار بھی نہیں

نسبت ہے جسم و روح کی اللہ رے اتحاد

سبحہ اگر نہیں ہے تو زنار بھی نہیں

بیٹھا ہوں اس کی یاد میں بھولا ہوں غیر کو

زاہد اگر نہیں ہوں ریاکار بھی نہیں

جائیں وہ قتل غیر کو ہم رشک سے مریں

ایسی تو اپنی جان سے بیزار بھی نہیں

آنا ہو آؤ ورنہ یہ کہہ دو نہ آئیں گے

سن لو یہ دو ہی باتیں ہیں طومار بھی نہیں

سودا تمام ہو گیا بازار اٹھ گیا

وہ دل بھی اب نہیں وہ خریدار بھی نہیں

طرز جفا بھی بھول گئی کیا وفا کے ساتھ

دل دار گر نہیں ہو دل آزار بھی نہیں

لیں گے ہزار در سے پلٹ کر در مراد

منعم نہ دیں تو کیا تری سرکار بھی نہیں

بھیجیں گے حسب حال انہیں گو نہ لکھ سکیں

کیا دامن اور دیدۂ خوں بار بھی نہیں

بلبل چمن کو دیکھ خزاں کے ستم کو دیکھ

گل کا تو ذکر کیا ہے کہیں خار بھی نہیں

آزاد ہیں شراب کے عادی نہیں حبیبؔ

احباب گر پلائیں تو انکار بھی نہیں

sab mein hun phir kisi se sarokar bhi nahin

ghafil agar nahin hun to hushyar bhi nahin

qimat agar wo dete hain takrar bhi nahin

kuchh ham ko dil ke dene mein inkar bhi nahin

nisbat hai jism-o-ruh ki allah re ittihad

subha agar nahin hai to zunnar bhi nahin

baitha hun us ki yad mein bhula hun ghair ko

zahid agar nahin hun riyakar bhi nahin

jaen wo qatl ghair ko ham rashk se maren

aisi to apni jan se bezar bhi nahin

ana ho ao warna ye kah do na aenge

sun lo ye do hi baten hain tumar bhi nahin

sauda tamam ho gaya bazar uth gaya

wo dil bhi ab nahin wo kharidar bhi nahin

tarz-e-jafa bhi bhul gai kya wafa ke sath

dil dar gar nahin ho dil azar bhi nahin

lenge hazar dar se palat kar dar-e-murad

munam na den to kya tiri sarkar bhi nahin

bhejenge hasb-e-hal unhen go na likh saken

kya daman aur dida-e-khun bar bhi nahin

bulbul chaman ko dekh khizan ke sitam ko dekh

gul ka to zikr kya hai kahin khar bhi nahin

azad hain sharab ke adi nahin habib

ahbab gar pilaen to inkar bhi nahin