سب شکایت ہے زندگانی کی

سب شکایت ہے زندگانی کی

جان نے دشمنیٔ جانی کی

ہم سبک دوش ہی جہاں سے گئے

نہ کسی طبع نے گرانی کی

ہاں سبک سار کر دے اے قاتل

جسم پر سر نے سرگرانی کی

روح تن پر وبال دوش ہوئی

ہے یہ افراط ناتوانی کی

عشق برباد کر گیا آخر

تھی خبر کس کو ناگہانی کی

ایسی اک تیغ آب دار لگا

پھر نہ مانگوں جو بوند پانی کی

دل ہوا فرط داغ سے اک باغ

عشق نے خوب باغبانی کی

اک ذرا کھول چشم عبرت میں

سیر کر اس جہان فانی کی

سینہ پر داغ حسرت و حرماں

اک نشانی ہے یہ جوانی کی

جو ہیں آسودگان عیش انہیں

کیا خبر اس غم نہانی کی

کیوں نہ ہو اشتیاق نظم ضمیرؔ

دھوم ہے اس کی خوش بیانی کی

sab shikayat hai zindagani ki

jan ne dushmani-e-jani ki

ham subuk dosh hi jahan se gae

na kisi taba ne girani ki

han subuk sar kar de ai qatil

jism par sar ne sargirani ki

ruh tan par wabal dosh hui

hai ye ifrat natawani ki

ishq barbad kar gaya akhir

thi khabar kis ko nagahani ki

aisi ik tegh-e-ab dar laga

phir na mangun jo bund pani ki

dil hua fart-e-dagh se ik bagh

ishq ne khub baghbani ki

ik zara khol chashm-e-ibrat mein

sair kar is jahan-e-fani ki

sina par dagh hasrat-o-hirman

ik nishani hai ye jawani ki

jo hain asudagan-e-aish unhen

kya khabar is gham-e-nihani ki

kyun na ho ishtiyaq nazm zamir

dhum hai us ki khush bayani ki