سب کی سب کیا ہیں شب قدر ہماری راتیں

سب کی سب کیا ہیں شب قدر ہماری راتیں

کٹتی ہیں آنکھوں ہی میں ہجر کی ساری راتیں

ہائے کیا پیار سے سوتے تھے لپٹ کر اے جان

یاد ہر دم مجھے آتی ہیں وہ پیاری راتیں

دونوں زلفوں میں ہیں خورشید سے تاباں عارض

روز روشن کے برابر ہیں تمہاری راتیں

جو گھڑی ہے نظر آتی ہے مجھے ایک پہاڑ

ہیں غضب فرقت محبوب کی بھاری راتیں

ہجر میں صبح سے تا شام بجائے شبنم

میری آنکھوں سے لہو رکھتی ہیں جاری راتیں

سن پڑے رہتے ہیں بے یار اندھیرے میں ہم

ہیں شب گور کے مانند ہماری راتیں

شب تاریک جدائی میں یہ چلاتا ہوں

دق بہت کرتی ہیں یا حضرت باری راتیں

تیری زلفوں کے لیے شانہ بکف ہے ہر دن

اور کرتی ہیں تری آئینہ داری راتیں

فصل گل میں وہ گل تر نہیں گل کر دے چراغ

کہ سیہ چاہئیں اے باد بہاری راتیں

مرغ زرین فلک پر ہے یقین خفاش

کس قدر میرے دنوں میں ہوئیں ساری راتیں

دن کے بدلے بھی یہی آتی ہیں غم خواری کو

مجھ سے رکھتی ہیں بہت ہجر میں یاری راتیں

دن تو ناسخؔ کے بہ ہر حال گزر جاتے ہیں

پر جدائی میں بہت لاتی ہیں خواری باتیں

sab ki sab kya hain shab-e-qadr hamari raten

katti hain ankhon hi mein hijr ki sari raten

hae kya pyar se sote the lipat kar ai jan

yad har dam mujhe ati hain wo pyari raten

donon zulfon mein hain khurshid se taban ariz

roz-e-raushan ke barabar hain tumhari raten

jo ghari hai nazar ati hai mujhe ek pahar

hain ghazab furqat mahbub ki bhari raten

hijr mein subh se ta sham bajae shabnam

meri ankhon se lahu rakhti hain jari raten

sun pare rahte hain be yar andhere mein ham

hain shab-e-gor ke manind hamari raten

shab-e-tarik judai mein ye chillata hun

diq bahut karti hain ya hazrat-e-bari raten

teri zulfon ke liye shana bakaf hai har din

aur karti hain tiri aina dari raten

fasl-e-gul mein wo gul-e-tar nahin gul kar de charagh

ke siyah chahiyen ai bad-e-bahari raten

murgh-e-zaryun falak par hai yaqin-e-khuffash

kis qadar mere dinon mein huin sari raten

din ke badle bhi yahi ati hain gham khwari ko

mujh se rakhti hain bahut hijr mein yari raten

din to nasikh ke ba har hal guzar jate hain

par judai mein bahut lati hain khwari baten