آوے خزاں چمن کی طرف گر میں رو کروں

آوے خزاں چمن کی طرف گر میں رو کروں

غنچہ کرے گلوں کو صبا گر میں بو کروں

آزردہ اس چمن میں ہوں مانند برگ خشک

چھیڑے جو ٹک نسیم مجھے سو غلو کروں

آنکھوں سے جائے اشک گریں گل چمن چمن

منظور گریہ گر میں ترا رنگ و بو کروں

آیا ہوں پارہ دوزئی دل سے نپٹ بتنگ

ایسے پھٹے ہوئے کو میں کب تک رفو کروں

کیا آرزو کہ خاک میں اپنی ملیں نہ یاں

کس رو سے اب فلک سے میں کچھ آرزو کروں

کہتا ہے آئنہ کہ ہے تجھ سا ہی ایک اور

باور نہیں تو لا میں ترے روبرو کروں

سارے ہی اس چمن سے ہوا خواہ اٹھ گئے

روؤں گلوں کو یا میں غم رنگ و بو کروں

قائمؔ یہ جی میں ہے کہ تقید سے شیخ کی

اب کے جو میں نماز کروں بے وضو کروں

awe khizan chaman ki taraf gar main ro karun

ghuncha kare gulon ko saba gar main bu karun

azurda is chaman mein hun manind-e-barg-e-khushk

chhere jo tuk nasim mujhe so ghulo karun

ankhon se jae ashk giren gul chaman chaman

manzur girya gar main tira rang-o-bu karun

aya hun para dozi dil se nipat batang

aise phate hue ko main kab tak rafu karun

kya arzu ke khak main apni milen na yan

kis ro se ab falak se main kuchh arzu karun

kahta hai aina ke hai tujh sa hi ek aur

bawar nahin to la mein tire rubaru karun

sare hi is chaman se hua khwah uth gae

roun gulon ko ya main gham-e-rang-o-bu karun

qaim ye ji mein hai ke taqid se shaikh ki

ab ke jo main namaz karun be wuzu karun