سامنے ان کے تڑپ کر اس طرح فریاد کی

سامنے ان کے تڑپ کر اس طرح فریاد کی

میں نے پوری شکل دکھلا دی دل ناشاد کی

اب یہی ہے وجہ تسکیں خاطر ناشاد کی

زندگی میں نے دیار حسن میں برباد کی

ہوش پر بجلی گری، آنکھیں بھی خیرہ ہو گئیں

تم تو کیا تھے، اک جھلک سی تھی تمہاری یاد کی

چل دیا مجنوں تو صحرا سے کسی جانب مگر

اک صدا گونجی ہوئی ہے نالہ و فریاد کی

نغمۂ پر درد چھیڑا میں نے اس انداز سے

خود بہ خود مجھ پر نظر پڑنے لگی صیاد کی

دل ہوا مجبور جس دم اشک حسرت بن گیا

روح جب تڑپی تو صورت بن گئی فریاد کی

اس حریم قدس میں کیا لفظ و معنی کا گزر

پھر بھی سب باتیں پہنچتی ہیں لب فریاد کی

تمتما اٹھے وہ عارض میرے عرض شوق پر

حسن جاگ اٹھا وہیں جب عشق نے فریاد کی

آشیاں میں اب کسی صورت نہیں پڑتا ہے چین

تھی نظر تاثیر میں ڈوبی ہوئی صیاد کی

شعر میں رنگینی جوش تخیل چاہیئے

مجھ کو اصغرؔ کم ہے عادت نالہ و فریاد کی

samne un ke tarap kar is tarah fariyad ki

main ne puri shakl dikhla di dil-e-nashad ki

ab yahi hai wajh-e-taskin khatir-e-nashad ki

zindagi main ne dayar-e-husn mein barbad ki

hosh par bijli giri, ankhen bhi khira ho gain

tum to kya the, ik jhalak si thi tumhari yad ki

chal diya majnun to sahra se kisi janib magar

ik sada gunji hui hai nala-o-fariyad ki

naghma-e-pur dard chhera main ne is andaz se

khud ba khud mujh par nazar parne lagi sayyad ki

dil hua majbur jis dam ashk hasrat ban gaya

ruh jab tarpi to surat ban gai fariyad ki

is harim-e-qudus mein kya lafz-o-maani ka guzar

phir bhi sab baten pahunchti hain lab-e-fariyad ki

tamtama uthe wo ariz mere arz-e-shauq par

husn jag utha wahin jab ishq ne fariyad ki

ashiyan mein ab kisi surat nahin parta hai chain

thi nazar tasir mein dubi hui sayyad ki

sher mein rangini-e-josh-e-takhayyul chahiye

mujh ko asghar kam hai adat nala-o-fariyad ki