سب چلے تیرے آستاں کو چھوڑ

سب چلے تیرے آستاں کو چھوڑ

بد زباں اب تو اس زباں کو چھوڑ

مت اٹھا یار تیرے کوچے میں

آن بیٹھے ہیں دو جہاں کو چھوڑ

وقت سختی کے آہ جاتی ہے

جان بھی جسم ناتواں کو چھوڑ

صحبت راست کب ہو کج سے برآر

تیر آخر چلا کماں کو چھوڑ

دست بیداد باغباں سے آہ

ہم چلے آخر آشیاں کو چھوڑ

باغ سے وہ پھرا تو مرغ چمن

لگ چلے ساتھ گلستاں کو چھوڑ

ناتوانی سے مثل نقش قدم

رہے ناچار کارواں کو چھوڑ

ہم نشیں کہہ تمام قصۂ عشق

آج کل پر نہ داستاں کو چھوڑ

یہ مرا حال ہے جو وہ قاتل

اٹھ گیا دم کے میہماں کو چھوڑ

جس طرح پھیر حلق پر خنجر

دے کوئی مرغ نیم جاں کو چھوڑ

کر جوانی پہ رحم جرأتؔ کی

بس غم عشق اس جواں کو چھوڑ

sab chale tere astan ko chhor

bad zaban ab to is zaban ko chhor

mat utha yar tere kuche mein

an baithe hain do jahan ko chhor

waqt sakhti ke ah jati hai

jan bhi jism-e-natawan ko chhor

sohbat rast kab ho kaj se barar

tir akhir chala kaman ko chhor

dast-e-bedad baghban se ah

ham chale akhir ashiyan ko chhor

bagh se wo phira to murgh-e-chaman

lag chale sath gulsitan ko chhor

natawani se misl-e-naqsh-e-qadam

rahe nachar karwan ko chhor

ham nashin kah tamam qissa-e-ishq

aj kal par na dastan ko chhor

ye mira hal hai jo wo qatil

uth gaya dam ke mehman ko chhor

jis tarah pher halq par khanjar

de koi murgh-e-nim jan ko chhor

kar jawani pe rahm jurat ki

bas gham-e-ishq is jawan ko chhor