سب کہتے ہیں دیکھ اس کو سر راہ زمیں پر — شیخ قلندر بخش جرات (Qalandar Bakhsh Jurat)

سب کہتے ہیں دیکھ اس کو سر راہ زمیں پر

کس راہ سے آیا یہ اتر ماہ زمیں پر

بیمار کی تیرے تو کہانی ہے بڑی پر

قصہ ہے اب اک دم میں ہی کوتاہ زمیں پر

تو چھت پہ چڑھا اس کے ہے ایسا کہ بس آخر

چھوڑے گی اتروا کے تری چاہ زمیں پر

یہ وہ دل مضطر ہے کہ جوں برق تپیدہ

گاہے بہ فلک آئے نظر گاہ زمیں پر

کچھ سوچ کے بس کانپنے لگتا ہوں میں جرأتؔ

پڑتا ہے قدم زور سے جب آہ زمیں پر