رنگ دیکھا تری طبیعت کا

رنگ دیکھا تری طبیعت کا

ہو چکا امتحاں محبت کا

یہی نقشہ رہا جو فرقت کا

بت بنا لیں گے تیری صورت کا

نہ ملو تم گلے رقیبوں سے

خون ہوتا ہے میری حسرت کا

تیری رفتار نے نشان دیا

نام سنتے تھے ہم قیامت کا

دیکھتا ہوں پری جمالوں کو

مجھ کو لپکا ہے اچھی صورت کا

ملتی جلتی ہے زلف شب گوں سے

کیا مقدر ہے شام فرقت کا

تیری ٹھوکر کے آگے او ظالم

پاؤں جمتا نہیں قیامت کا

وہ مرے حال پر ترے الطاف

وہ زمانہ تری محبت کا

سن کے دشمن کی بات پی جاؤں

مقتضا یہ نہیں ہے غیرت کا

وہ بگڑتے ہیں مجھ سے بن بن کر

رنگ رخ رنگ ہے طبیعت کا

جانتے ہیں فروغؔ کو ہم بھی

اک یہی شخص ہے مروت کا

rang dekha tiri tabiat ka

ho chuka imtihan mohabbat ka

yahi naqsha raha jo furqat ka

but bana lenge teri surat ka

na milo tum gale raqibon se

khun hota hai meri hasrat ka

teri raftar ne nishan diya

nam sunte the ham qayamat ka

dekhta hun pari jamalon ko

mujh ko lapka hai achchhi surat ka

milti jalti hai zulf-e-shab gun se

kya muqaddar hai sham furqat ka

teri thokar ke age o zalim

paon jamta nahin qayamat ka

wo mire hal par tire altaf

wo zamana tiri mohabbat ka

sun ke dushman ki bat pi jaun

muqtaza ye nahin hai ghairat ka

wo bigarte hain mujh se ban ban kar

rang-e-rukh rang hai tabiat ka

jante hain farogh ko ham bhi

ik yahi shakhs hai murawwat ka