رنگ دل رنگ نظر یاد آیا

رنگ دل رنگ نظر یاد آیا

تیرے جلووں کا اثر یاد آیا

وہ نظر بن گئی پیغام حیات

حلقۂ شام و سحر یاد آیا

یہ زمانہ یہ دل دیوانہ

رشتۂ سنگ و گہر یاد آیا

یہ نیا شہر یہ روشن راہیں

اپنا انداز سفر یاد آیا

راہ کا روپ بنی دھوپ اپنی

کوئی سایہ نہ شجر یاد آیا

کب نہ اس شہر میں پتھر برسے

کب نہ اس شہر میں سر یاد آیا

گھر میں تھا دشت نوردی کا خیال

دشت میں آئے تو گھر یاد آیا

گرد اڑتی ہے سر راہ خیال

دل ناداں کا سفر یاد آیا

ایک ہنستی ہوئی بدلی دیکھی

ایک جلتا ہوا گھر یاد آیا

اس طرح شام کے سائے پھیلے

رات کا پچھلا پہر یاد آیا

پھر چلے گھر سے تماشا بن کر

پھر ترا روزن در یاد آیا

کسی پتھر کی حقیقت ہی کیا

دل کا آئینہ مگر یاد آیا

آنچ دامان صبا سے آئی

اعتبار گل تر یاد آیا

دل جلا دھوپ میں ایسا اب کے

پاؤں یاد آئے نہ سر یاد آیا

گر پڑے ہاتھ سے کاغذ باقیؔ

اپنی محنت کا ثمر یاد آیا

rang-e-dil rang nazar yad aya

tere jalwon ka asar yad aya

wo nazar ban gai paigham-e-hayat

halqa-e-sham-o-sahar yad aya

ye zamana ye dil-e-diwana

rishta-e-sang-o-guhar yad aya

ye naya shahr ye raushan rahen

apna andaz-e-safar yad aya

rah ka rup bani dhup apni

koi saya na shajar yad aya

kab na is shahr mein patthar barse

kab na is shahr mein sar yad aya

ghar mein tha dasht nawardi ka khayal

dasht mein ae to ghar yad aya

gard urti hai sar-e-rah-e-khayal

dil-e-nadan ka safar yad aya

ek hansti hui badli dekhi

ek jalta hua ghar yad aya

is tarah sham ke sae phaile

rat ka pichhla pahar yad aya

phir chale ghar se tamasha ban kar

phir tira rauzan-e-dar yad aya

kisi patthar ki haqiqat hi kiya

dil ka aina magar yad aya

anch daman-e-saba se ai

etibar-e-gul-e-tar yad aya

dil jala dhup mein aisa ab ke

paon yad ae na sar yad aya

gir pare hath se kaghaz baqi

apni mehnat ka samar yad aya