رنج کھینچے تھے داغ کھائے تھے

رنج کھینچے تھے داغ کھائے تھے

دل نے صدمے بڑے اٹھائے تھے

پاس ناموس عشق تھا ورنہ

کتنے آنسو پلک تک آئے تھے

وہی سمجھا نہ ورنہ ہم نے تو

زخم چھاتی کے سب دکھائے تھے

اب جہاں آفتاب میں ہم ہیں

یاں کبھو سرو و گل کے سائے تھے

کچھ نہ سمجھے کہ تجھ سے یاروں نے

کس توقع پہ دل لگائے تھے

فرصت زندگی سے مت پوچھو

سانس بھی ہم نہ لینے پائے تھے

میرؔ صاحب رلا گئے سب کو

کل وے تشریف یاں بھی لائے تھے

ranj khinche the dagh khae the

dil ne sadme bare uthae the

pas-e-namus-e-ishq tha warna

kitne ansu palak tak ae the

wahi samjha na warna ham ne to

zakhm chhati ke sab dikhae the

ab jahan aftab mein ham hain

yan kabhu sarw-o-gul ke sae the

kuchh na samjhe ke tujh se yaron ne

kis tawaqqo pe dil lagae the

fursat-e-zindagi se mat puchho

sans bhi ham na lene pae the

mir sahab rula gae sab ko

kal we tashrif yan bhi lae the