آ گئی سر پر قضا لو سارا ساماں رہ گیا

آ گئی سر پر قضا لو سارا ساماں رہ گیا

اے فلک کیا کیا ہمارے دل میں ارماں رہ گیا

باغباں ہے چار دن کی باغ عالم میں بہار

پھول سب مرجھا گئے خالی بیاباں رہ گیا

اتنا احساں اور کر للہ اے دست جنوں

باقی گردن میں فقط تار گریباں رہ گیا

یاد آئی جب تمہارے روپ روشن کی چمک

میں سراسر صورت آئینہ حیراں رہ گیا

لے چلے دو پھول بھی اس باغ عالم سے نہ ہم

وقت رحلت حیف ہے خالی ہی داماں رہ گیا

مر گئے ہم پر نہ آئے تم خبر کو اے صنم

حوصلہ اب دل کا دل ہی میں مری جاں رہ گیا

ناتوانی نے دکھایا زور اپنا اے رساؔ

صورت نقش قدم میں بس نمایاں رہ گیا

a gai sar par qaza lo sara saman rah gaya

ai falak kya kya hamare dil mein arman rah gaya

baghban hai char din ki bagh alam mein bahar

phul sab murjha gae khali bayaban rah gaya

itna ehsan aur kar lillah ai dast-e-junun

baqi gardan mein faqat tar-e-gareban rah gaya

yad ai jab tumhare rup raushan ki chamak

main sarasar surat-e-aina hairan rah gaya

le chale do phul bhi is bagh-e-alam se na ham

waqt-e-rehlat haif hai khali hi daman rah gaya

mar gae ham par na ae tum khabar ko ai sanam

hausla ab dil ka dil hi mein miri jan rah gaya

natawani ne dikhaya zor apna ai rasa

surat-e-naqsh-e-qadam mein bas numayan rah gaya