رنجش تری ہر دم کی گوارا نہ کریں گے

رنجش تری ہر دم کی گوارا نہ کریں گے

اب اور ہی معشوق سے یارانہ کریں گے

باندھیں گے کسی اور ہی جوڑے کا تصور

سر دھیان میں اس زلف کے مارا نہ کریں گے

امکان سے خارج ہے کہ ہوں تجھ سے مخاطب

ہم نام کو بھی تیرے پکارا نہ کریں گے

یک بار کبھی بھولے سے آ جائیں تو آ جائیں

لیکن گزر اس گھر میں دوبارا نہ کریں گے

کیا خوب کہا تو نے جو کھولوں ابھی آغوش

ملنے سے مرے آپ کنارا نہ کریں گے

گو خاک میں مل جائیں ہم اور وضع بدل جائیں

پر تجھ سے ملاقات خود آرا نہ کریں گے

اس نرگس بیمارؔ سے رکھتے ہیں شباہت

ہرگز سوئے عبہر بھی اشارا نہ کریں گے

ranjish tiri har dam ki gawara na karenge

ab aur hi maashuq se yarana karenge

bandhenge kisi aur hi jore ka tasawwur

sar dhyan mein is zulf ke mara na karenge

imkan se kharij hai ke hun tujh se mukhatib

ham nam ko bhi tere pukara na karenge

yak bar kabhi bhule se a jaen to a jaen

lekin guzar is ghar mein dobara na karenge

kya khub kaha tu ne jo kholun abhi aghosh

milne se mire ap kinara na karenge

go khak mein mil jaen ham aur waza badal jaen

par tujh se mulaqat khud ara na karenge

is nargis bimar se rakhte hain shabahat

hargiz su-e-abhar bhi ishara na karenge